Governu la autoriza kompañia aéreo tula pasajeiru husi Díli ba rai-liur

Governu liu husi Ministru Transporte no Komunikasaun, José Agostinho da Silva, la autoriza  kompaniã aéreo sira atu halo operasaun hodi tula pasajeiru husi Díli ba rai-liur, tanba Timor-Leste aplika hela Estadu Emerjénsia (EE).

“Durante Governu implementa EE ne’e sei la autoriza kompañia aéreo sira atu halo operasaun husi rai-laran ba rai-liur, tanba regra. Maibé bainhira sidadaun ruma hakarak mai husi rai-liur bele koordena ho ita-nia Embaixada Timor nian iha nasaun ida-idak hodi koordena ho Governu Timor-Leste atu bele fasilita  sira mai Timor-Leste no antes ne’e mos ita-nia Governu Timor-Leste koordena ho Governu Portugal fasilita ona sidadaun Portugueza, inklui Timor-Oan sira hodi tula mai Timor-Leste, tanba hetan konkordansia hosi parte rua”, Ministru Transporte no Komunikasaun hato’o lia hirak ne’e hafoin halo lansamentu ba sistema dijitál ticket ró nakroma iha Portu Díli, Segunda (26/10/2020).

José Agustinho subliña, atu evita transmisaun COVID-19 ne’e Governu aprova  ona dekretu lei ida ne’ebé hetan ona promulgasaun husi Prezidente Repúblika (PR), Francisco Guterres “Lú Olo”.

Governante ne’e mós informa, voo sira ne’ebé mak autoriza durante implementasaun EE mak ba kategoria essential Flight.

“Governu la autoriza transporte aéreo atu tula pasajeiru sira husi rai-laran ba rai-liur, maibé sira ne’ebé mak tama kategoria emerjénsia liga ba EE hodi prevene transmisaun COVID-19 ne’e Governu fasilita, ne’e duni banhira iha períodu implementa EE ne’e ita só halo atendimentu de’it ba parte emerjénsia nian”, katak José Agustinho.

Tuir planu, iha loron 15, fulan Novembru ne’e, Governu Filipina sei tula nia sidadaun sira iha Timor-Leste fila ba Filipina ho sira-nia aviaun rasik, tanba iha ona karta husi ba Governu Timor-Leste. aba