MOP sei rezolve problema bee moos iha proposta OJE 2021

Ministru Obras Públikas (MOP), Salvadór Pires, promete sei aloka osan iha proposta Orsamentu Jerál Estadu (OJE) tinan 2021 hodi halo manutensaun ba estasaun bee moos balun ne’ebé la di’ak, hodi difikulta populasaun asesu ba bee moos.

Governante ne’e afirma, Timor-Leste iha estasaun bee moos atus ida resin, maibe balun kondisaun estável hela no balun mak presiza duni atu halo manutensaun.

“Ba iha verba USD 3 milloens ba manutensaun bee moos, ami tau hela destinadu ba manutensaun bee moos sira ne’ebé mak la’o hela, iha 2018 ami tama, ita iha estasaun bee moos 1700 i tal ne’ebé hosi ami nia dadus informasaun baze ba água no saneamentu kuaze 40% 800 i tal estasaun mak di’ak, nune’e iha 2019 ami tau osan ba ida ne’e, para halo manutensaun ba iha estasoens sira ne’ebé mak aat tiha ona, atu nune’e ita bele mantein fornesimentu bee moos ba ita nia komunidade sira, maibe ida ne’e la to’o, dezafiu mak ne’e, presiza halo investimentu iha setór ida ne’e”, nia dehan tan.

Salvadór akresenta, iha tinan 2021 MOP hanoin katak atu promove tan projetu foun ba reabilitasaun iha setór ne’e, atu nune’e ita bele fó asesu barak liu tan ba komunidade sira.

“Iha verba USD 100 milloens ba estudu, ne’e verba ne’ebé mak mai hosi Care Over mai hosi OJE 2019, hodi halo estudu ba estrada 12 pakotes, liu-liu master plan ba munisípiu sira ne’ebé mak seidauk hetan, exeptu Díli, Baukau, Vikeke, Lospalos ho Same ne’ebé mak iha tiha ona, ho nune’e ami ko’alia hela finansas atu hetan apoiu ba empréstimu ba sistema bein integradu ba munisípiu 5 ne’e”, MOP ne’e ba deputadu sira iha diskusaun proposta OJE 2020, Kuarta (07/10/2020).

Alénde ne’e, deputadu bankada CNRT, Domingos de Carvalho, sujere ba MOP atu bele rezolve ho la-lais projetu sira ne’ebé mak finaliza ona  instalasaun eletrisidade, maibé seidauk loke liña ba Komunidade sira, tanba komunidade presiza ahi naroman hodi fasilita oan sira estuda no halo negósiu.

“Projetu sira ne’ebé hotu ona, maibé la selu, tanba laiha kontratu no balun balun iha kontratu mós seidauk selu, liu-liu hanesan eletrisidade ida iha Suai Fohorem ne’e, ida ne’e finaliza kuaze tinan 3 ona, kalan-kalan manu kakúk sira mak ba túr iha leten, populasaun tanát de’it, tanba la oferese ahi”, haktuir Governante ne’e.

Salvadór informa, problema saída de’it ema haruka ne’e mak sala ka kompaña mak sala mós lori ba Tribunal, maibé tenke loke ona enérjia ne’e ba komunidade, la’os promesa de’it iha kampaña mak dehan prioridade eletrisidade, bee ho estrada.

Entretantu proposta orsamentu ba Ministériu Obras Públikas (MOP) ho montante tokon USD 195.423 ne’e, pasa iha faze espesialidade, ho votu a favór 43, kontra 9 no abstensaun 12. say