PD: Governu tenke buka solusaun ba Timor-Oan servisu iha rai-liur

Reprezentante povu iha uma fukun Parlamentu Nasionál (PN), liu-liu husi bankada PD, Mariano Assanami Sabino, husu ba Governu atu buka solusaun ba Timor-Oan sira ne’ebé servisu iha rai-liur, tanba foin la-lais ne’e Timor-Oan lubuk ida mak aluga aviaun ba Dubai no husi Dubai sira fahe malu, balun ba Portugal no balun ba Inglatera, hodi ba buka servisu.

“Ita hatene joven lubuk ida iha liur dezde inísiu ha’u dehan sira eroi, tanba sira bele fó apoiu inan-aman sira, hodi apoiu nia alin sira eskola ho servisu ne’ebé todan tebes iha Irlandia ho Inglatera, maibé sira bele halo ida ne’e. Ohin ita-nia traballadór sira barak iha Korea, iha Austrália no iha fatin barak, tanba kampu servisu laiha, tanba ne’e nu’udár membru Governu tenke fasilita no apoiu tomak oinsa mak sira bele ba liur”, Deputadu Bankada PD ne’e liu husi ninia intervensaun iha plenária, semana ne’e.

Assanami afirma, Governu iha responsabilidade atu fó apoiu urjentimente, tanba joven lubuk ida mak atu ba Irlandia hodi buka servisu, Timor-Leste laiha kampu traballu ba sidadaun sira, atu hala’o servisu atu sustenta família uma-laran.

Antes ne’e, iha loron 24, fulan ne’e, pasajeiru 100 resin mak labele halo viajen ba estranjeiru, tanba seidauk hetan aprovasaun husi Ministériu Transporte no Komunikasaun. ety