PD lamenta MF auzente iha debate OJE 2020

Deputada Partido Democrátíco (PD), Elvina de Sousa, lamenta ho atitude Ministru Finansas (MF), Fernando Hanjam, tanba la partisipa iha debate Orsamentu Jerál Estadu (OJE) tinan 2020, iha Parlamentu Nasionál (PN).

“Ami hakarak hatene, tanba saída MF, Fernando Hanjam la partisipa iha eventu importante ne’ebé hala’o hela ou debate OJE tinan 2020“, Deputada bankada PD ne’e liu husi ninia intervensaun iha debate OJE 2020, iha faze espesialidade, Segunda (05-10-2020).

Tuir Elvina, MF nia prezensa iha debate OJE ne’e importante, maibé dezde iha faze jeneralidade to’o espesialidade ona mós Governante ne’e la partisipa nafatin, ne’e tanba saída.

Maske bankada PD kestiona maka’as, maibé kona-bá preokupasaun ne’e Primeiru Ministru (PM), Taur Matan Ruak, la fó komentáriu.

Entretantu tuir observasaun durante diskusaun OJE tinan 2020, hahú debate iha jeneralidade to’o ohin loron (5/10) tama ona ba debate iha faze espesialidade, maibé MF ne’e la marka prezensa sein justifikasaun ruma husi Governu no servisu ne’ebé MF Fernando Hanjam halo, Vise MF, Sara Lobo Brites mak responsabiliza hotu. ety