PLP lamenta FRETILIN domina to’o administradór munisípiu

Deputadu bankada PLP, Noé da Silva ‘Buka Tuir’ lamenta, partidu FRETILIN ne’ebé interven iha rekrutamentu hodi domina administradór munisípiu tolu iha parte Leste hanesan Lautém, Baucau no Viqueque, halo PLP sai vítima, tanba ne’e PLP la konkorda ba situasaun refere.

Tuir nia haree, rekrutamentu ba administradór ne’ebé la’o iha munisípiu tolu parte Leste la tuir regra, tanba iha intervensaun polítika husi FRETILIN.

“Ami bolu ne’e hanesan atu viabiliza de’it, katak objetu ida ne’e atu labele monu ne’e mak ami bolu mai, maibe ikus mai ami atu sai fali vítima ne’e labele. Konserteza polítika hotu iha interese, hanesan partidu ne’ebé iha interese ba ukun, konserteza ami mós iha kandidatu rasik, soke mekanizmu ne’e ba ha’u pesoal ladun simu, tanba em vez de ita haree ba méritu, ezemplu hanesan iha Baucau, SD ida manan fali ema S1 ho S2 ne’e, ne’e bazeia ba saida mak hanesan ne’e, tanba ne’e mak ha’u kestiona iha ha’u nia publikasaun. señor Olivío ne’ebé agora dau-daun liu, ne’e kuarta klase, maibe restu ne’e S2 hotu, maibé la liu, entaun ami presiza hetan esplikasaun ba ida ne’e”, deputadu Noé da Silva, hato’o lamentasaun ne’e ba jornalista sira bainhira partisipa palestra kona-bá dezafiu no impaktu husi COVID-19 ba dezenvovlimentu, iha Palasíu Nobre, Segunda (12/10/2020).

Deputadu PLP ne’e hateten, akordu intendimentu ne’ebé PLP ho FRETILIN asina iha Hotel Timor, ba espasu membru Governu de’it, la’os atu domina to’o fali estrutura nível munisípiu, postu no suku hotu.

“Konkordansia ne’ebé iha kestaun ba membru Governu, la’os ba prezidente autoridade munisípiu sira, kona-bá membru Governu mak iha akordu ne’e hateten dehan, fatin ba membru Governu ne’ebé CNRT nian pertense ba partidu Viabilizadór (FRETILIN), maibe la signifika katak Prezidente autoridade hotu-hotu tenke ba FRETILIN, ne’e laloos”, afirma deputadu Noé.

Nia hatutan, kona-bá kestaun ida ne’e ba oin presiza iha komunikasaun di’ak liu tan, tanba esperiensia dau-daun hatudu ladun di’ak ba partidu polítiku ne’ebé ka’er Governu.

“Ami la dehan sira FRETILIN vióla akordu intendimentu, maibe ita presiza ko’alia di’ak ba malu kona-bá asuntu ne’e. Ami PLP iha komitmentu ida oinsa mak lori Governu ne’e ba oin, ne’e primeiru razaun, ami lakohi husik Estadu ida ne’e kada tinan-tinan iha eleisaun, tanba ne’e mak ita iha komitmentu ba Estadu ho ne’e mak ita hakarak la’o hamutuk, la quer dizer ami bolu ita boot sira atu manda tomak ne’e la’e”, haktuir deputadu PLP ne’e.

Nia hatutan, to’o agora seidauk iha komunikasaun kona-bá asuntu ne’e, maibe sira sempre iha hanoin ba oin, oinsa mak ko’alia atu labele repete tan iha munisípiu sira seluk.

Alénde ne’e, Xefe bankada FRETILIN, Francisco Miranda Branco, rejeita deklarasaun ne’e no konsidera rekrutamentu ne’ebé la’o, liu husi konkursu públiku, la’os nomeasaun polítika.

“Ha’u seidauk hatene rezultadu husi konkursu públiku ida ne’e, tanba iha ne’e mós marka diferénsia, uluk iha CNRT nia tempu hili de’it administradór sira, maibé Governu ida ne’e mai nia diferénsia hodi hamosu katak ida ne’e tenke liu husi teste hodi selesiona ema kualifikadu atu ezerse sira nia funsaun hanesan Prezidente no Administradór munisípiu nian”, espilika deputadu Branco.

Nia dehan, Administradór sira ne’ebé mak eleitu ne’e la’os husi FRETILIN, maibe konkursu abertu signifika ema sé de’it bele kompete, mezmu la’os funsionáriu mós bele rekere hodi tuir konkursu, la hanesan ne’ebé hili de’it.

Enkuantu Olívio Freitas Bulesa hanesan vensedór Administradór iha munisípiu Baucau, Domingos Sávio, vensedór iha munisípiu Lautém no husi Viqueque, Januário Soares Bolly mak sai vensedór. Say