PM Taur: Ha’u la fó sala Maun Xanana

Primeiru Ministru (PM), Taur Matan Ruak, deklara nia parte la fó sala ba lider Nasionál, Kay Rala Xanana Gusmão, maibé sala ne’e mai husi ema hirak ne’ebé haleu lider nasionál ne’e hodi diriji Governu durante tinan 10. 

“Ha’u lakohi atu hatudu liman ba ita bo’ot sira, tanba ne’e la’os ha’u-nia ábitu durante tempu naruk, ha’u servisu ba Timor, tanba prinsipiu ida ne’ebé orienta ha’u, iha tempu susar ita mate hamutuk iha tempu di’ak ita basa liman hamutuk, bainhira ha’u uza hanesan ita bo’ot sira uza, primeira vítima mak CNRT tamba ukun ona tinan 10, ha’u la fó sala ba Maun Xanana, ha’u fó sala ba sira ne’ebé haleu nia hodi diriji Governu durante tinan 10 nia laran”, afirma, Primeiru Ministru, Taur Matan Ruak, iha Parlamentu Nasionál (PN), Sesta (02/10/2020).

Taur afirma, nia parte koñese lider nasionál, Kay Rala Xanana Gusmão, di’ak liu membru parlamentu sira, tanba ne’e husu atu hamutuk bainhira rai ida ne’e iha hela situasaun krize.

“Señor Xanana, ha’u ninia wakil durante tinan 17, ha’u koñese nia di’ak liu ita bo’ot sira tur iha ne’e, tanba ne’e ha’u reforsa liu tan ha’u-nia apelu katak, ne’e tempu ita atu hamutuk, tanba iha tempu nasaun ida tama iha situasaun krize ne’e mak tempu lolos ita hamutuk,” dehan PM Taur.

Governante ne’e kontinua husu ba reprezentante povu iha uma fukun PN, atu fó apoiu ba Governu ida ne’e hodi rezolve problema barak ne’ebé membru PN sira aprezenta.

“PN ne’e iha nia esperiensia rasik, sé mak atu fó lisaun, iha momentu  Xefe Estadu, nein iha unanimidade akontese iha PN, tamba saida ohin loron ita labele ajuda malu no ajuda Governu hodi rezolve problema ne’ebé barak ita bo’ot sira koalia, ha’u espera ita bo’ot sira iha korajen, tamba PN iha ona esperiensia,”afirma Taur Matan Ruak.Cin