PN finaliza diskusaun OJE 2020 billiaun USD 1.4 iha espesialidade

Deputadu sira kinta lejislatura finaliza ona diskusaun ba proposta Orsamentu Jerál Estadu (OJE) tinan 2020 ho montante billiaun USD 1.497.100 iha faze espesialidade no aprova orsamentu ba ministériu 19 ho sekretáriu estadu sira, inklui Prezidénsia Repúblika, Primeiru Ministru ho Parlamentu Nasionál, Tribunal, ajénsia no autoridade sira hotu.

Diskusaun ne’e hala’o durante loron 3, ho final global loron 1, nune’e hamutuk loron 4, hahú hosi Segunda-Feira to’o Kinta-feira semana ne’e, halo aprovasaun kada ministériu ho nia orsamentu rasik.

Iha loron dahuluk, Prezidénsia Repúblika ho total despeza tokon USD 6.044, Parlamentu Nasionál ho montante  millaun USD 12.040, Primeiru Ministru USD 5.700, ho ministériu haat (4) no sekretáriu estadu haat (4).

Iha loron daruak, Parlamentu Nasionál aprova fundu COVID-19, dotasaun ba Governu hotu, Ministériu Negósiu Estranjeiru no Kooperasaun, Ministériu Justisa, Ministériu Administrasaun Estatál, Ministériu Saúde, Ministériu Edukasaun Juventude no Desportu, inklui Ministériu Ensinu Superior, Siénsia no Kultura ho sekretária estadu rua (2).

Iha loron datoluk faze espesialidade ne’e, Parlamentu Nasionál (PN), konsege aprova orsamentu ba Ministériu Solidaridade Sosial no Inkluzaun, Ministériu Asuntu Kombatente no Libertasaun Nasionál, Ministériu Ordenamentu, Ministériu Obras Públikas, Ministériu Transporte no Komunikasaun, Ministériu Turizmu Komérsiu no Indústria, Ministériu Agrikultura no Peska, inklui Ministériu Interior, Ministériu Defeza ho Ministériu Petróleu no Minerál.

Alénde iha Parlamentu mós konsege aprova autoridade administrasaun munisípiu sira ho ajénsia Estadu sira hotu.

Durante diskusaun deputadu sira aprezenta proposta 51 iha plenária Parlamentu Nasionál, hosi proposta ne’e, kuaze maioria ne’ebé aprezenta hosi deputada CNRT sira aprezenta ne’e, barak liu retira no la pasa, maibé uitoan de’it mak pasa iha plenária.

Entretantu aprovasaun finál global sei realiza iha Kinta (ohin-red), hafoin Komisaun C (finansas públikas) prepara redasaun finál hosi rezultadu diskusaun espesialidade ne’e no hafoin pasa iha finál global sei haruka ba Xefe Estadu atu promulga. Say