PN konklui ona kalendáriu debate OJE 2021

Uma fukun Parlamentu Nasionál (PN) konklui ona kalendáriu debate proposta Orsamentu Jerál Estadu (OJE) tinan 2021.

“Ha’u hakarak relata husi komisaun C aprova ona sira-nia kalendáriu ne’ebé sira sei hahú panorama orsamentál no tama kedas ba audénsia públika, alende ne’e mós komisaun C sira tau mós kalendáriu debate OJE iha faze jeneralidade no espesialidade, kalendáriu ne’ebé komisaun C halo ne’e pasa ho votu unanimidade. Komisaun C nia atividade relasiona panorama orsamentál sei realiza durante loron 4 to’o loron 5, iha fulan Novembru ne’e, ne’ebé sei hala’o iha Hotel Novo Turismo. Iha loron 6,  fulan Novembru, komisaun sei hahú ona audénsia públika ho ministériu sira no ajenda debate jeneralidade OJE 2021 sei hahú iha loron 1, fulan Dezembru no sei termina iha loron 18, fulan Dezembru, tinan ne’e“, Sekretária meza PN, Lídia Norberta liu husi konferénsia imprensa iha PN, Kinta (29-10-2020).

Lídia srelata, alende ne’e mós komisaun C tau mós kalendáriu debate OJE iha faze jeneralidade, espesialidade no kalendáriu ne’ebé komisaun C halo ne’e pasa ho votu unanimidade.

Entretantu hafoin baixa proposta lei OJE ba PN, komisaun sira iha PN balun iha ona kalendáriu no aprova tiha ona, maibé balun seidauk konklui sira-nia kalendáriu ba panorama orsamentál no audénsia públika ho ministériu sira.

Proposta lei OJE 2021 ho montante billiaun 1.8 ne’e, Governu aprezenta ho pedidu normál ba PN, iha loron 15, fulan ne’e no husi billiaun 1.8 ne’e kompostu hosi saláriu vensimentu tokon USD 200 resin bens servisu tokon USD 400 liu, transferénsia públika tokon 600 resin, kapitál menór tokon USD 61 no kapital dezenvolvimentu tokon USD 500 resin.

Tuir planu PN sei hala’o audénsia públika ho ministériu sira kona-bá proposta OJE 2021, iha loron 6, fulan Novembru ne’e. ety