PN: MS halo diskriminasaun iha prosesu transferénsia pasiente ba rai-liur

Reprezentante povu iha uma fukun Parlamentu Nasionál (PN), Elvina de Sousa, husu ba Ministériu Saúde (MS) atu labele hamosu diskriminasaun ba prosesu transferénsia pasiente sira ba rai-liur, tanba dau-daun ne’e prosesu transferénsia ne’e balun lais no balun lae.

“Prosesu transferénsia ba ita-nia maluk sira ba liur, husu atu labele esklui pasiente balun ne’ebé iha mós nesesidade atu halo evakuasaun pasiente balun nia prosesu dada naruk, maibé iha pasiente balun nia prosesu evakuasaun ho la-lais liu. Prosesu evakuasaun pasiente ba rai-liur labele hamosu diskriminasaun, tenke halo tratamentu ne’ebé hanesan, tanba pasiente balun prosesu evakuasaun ho la-lais, maibé balun lae”, Deputada PD ne’e liu husi ninia intervensaun iha plenária ho lian Portugés, Tersa (13-10-2020).

Elvina husu mós ba MS atu tau atensaun no halo tratamentu ne’ebé di’ak ba pasiente sira ne’ebé ho idade la produtivu no veteranu sira.

Nune’e mós deputadu bankada PLP, Abel Pires, hateten, ho prezensa COVID-19 fanun Timor atu harii ospitál internasionál ne’ebé kualidade hanesan ho ospitál internasionál iha rai-liur, nune’e Timor-Leste labele dependénsia ba ospitál iha estranjeiru.

“Ministru ita presiza haree posibilidade atu ospitál internasionál iha ita-nia rai ho kualidade ne’ebé mak hanesan ospitál iha rai-liur, nune’e ita la presiza dependénsia totál ida ne’e ba oin ho situasuan COVID-19 amplifika ita-nia nesesidade atu harii ospitál iha rai laran, nune’e ita-nia asuwa’in sira labele. Tanba agora dau-daun hein aviaun, sei hein kliring husi ospitál Malaysia no Singapura, ema nia moras la to’o iha ne’ebá loron ba loron ita rona istória triste, pasiente sira hein sira-nia tempu atu sai sira lakon sira nia vida. Ha’u haree iha orsamentu fundu infraestrutura, ita iha planu atu harii ospitál internasionál iha Timor, ha’u hanoin sé ida ne’e mak ita bele realiza iha tinan oin ne’e di’ak ba ita“, informa Abel.

Hatán ba kestaun ne’e, Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten, kona-bá kestaun ne’e nia parte sei hato’o ba MS, hodi buka solusaun.

Entretantu Orsamentu Jerál Estadu (OJE) ba tinan 2020 ba MS hamutuk USD 42.000 resin, aloka ba saláriu vensimentu USD 22.000 resin, bens no servisu USD 8.860. ety