Polémika osan sei la mai TL, FRETILIN: Informasaun ne’e la loos

Deputada bankada FRETILIN, Maria Angelica Rangel, hateten, kona-ba polémika iha Média Sosiál (MédSos) katak, osan Timor-Leste iha Banku Federal Amérika sei la mai ne’e informasaun falsa, tanba informasaun ne’e la sai husi Banco Central de Timor-Leste (BCTL).

“Povu kestiona PN aprova osan ne’e osan sei la mai husi Amérika ne’e sala, tanba sa ha’u dehan sala ‘tuir lei katak ema ne’ebé mak atu públika osan hafoin PN aprova ne’e osan atu mai ou la’e, Governadór BCTL mak bele ko’alia nia mak iha direitu“, Deputada bankada FRETILIN hato’o deklarasaun ne’e liu husi ninia intervensaun iha debate Orsamentu Jerál Estadu (OJE) tinan 2020 iha faze jeneralidade iha Parlamentu Nasionál (PN), Sesta (02-10-2020).

Maria klarifika, wainhira PN aprova tiha orsamentu tuir lei Governadór BCTL mak bele relata ba Primeiru Ministru (PM) no PM rasik sei relata ba Prezidente Repúblika (PR) katak, osan bele mai kaa la mai.

Antes ne’e, iha entrevista ho média online balun Governadór BCTL, Abrão de Vasconselhos esplika, prosesu transferénsia fundu petróleu ba konta Governu Timor-Leste estabelese ona iha lei númeru 9/2005, loron 3, fulan Agostu, kona-bá lei fundu petróleu ne’ebé tuir artigu 139 konstituisaun RDTL katak, petrolíferu hanesan propriedade Estadu.

Tanba ne’e, Banku Federál Amérika bele halo transferénsia ba Governu ho autorizasaun husi PN, wainhira hetan ona promulgasaun husi PR.

Enkuantu, PM, Taur Matan Ruak deklara Governu seidauk simu karta ruma husi Banku Federál Estadu Unidu Amérika kona-bá sei la halo transferénsia Orsamentu Jerál Estadu (OJE) ba BCTL. Ety