Atribuisaun sesta bázika hanesan solidariedade husi Governu sentral

Atribuisaun sesta bázika ba populasaun iha teritóriu tomak, hanesan asaun solidaridade husi Governu sentrál, relasiona ho surtu COVID-19.

Planu rekuperasaun ekonómika ne’ebé Governu implementa liu husi atribuisaun sesta bázika ba populasaun iha teritóriu Timor-Leste, hanesan asaun solidaridade Governu sentral nian ba komunidade hotu relasiona ho surtu COVID-19 ne’ebé hamate ema barak iha mundu no Timor-Leste konsege detekta virus refere, maske seidauk rejistu númeru mate.

“Atu hatudu Governu nia solidariedade Governu sentral nia apoiu programa planu rekuperasaun ekonómika, liu-liu programa sesta bázika ohin membru Governu sira, ita boot sira haree ami mai iha ne’e membru Governu sira hotu ne’ebé partisipa ba iha planu rekuperasaun ekonómika, liu-liu programa sesta bázika ami mai iha ne’e atu bele fó apoiu programa ida ne’e, atu programa ida ne’e bele susesu”, Ministru Koordenadór Asuntu Ekonómiku (MKAE), Joaquim Amaral bainhira lansa programa sesta bázika iha postu administrativu Zumalai, munisípiu Covalima, Sabádu (07/11/2020).

Planu rekuperasaun ekonómika ne’ebé Governu implementa liu husi programa sesta bázika ba kada individu iha Timor-Leste tomak, lansa ona iha loron 27 fulan Outubru liu ba, iha postu administrativu Metinaro, munisípiu Dili.

Programa distribuisaun fahe nesesidade bázika ba kada ema ida Governu hala’o ona iha Metinaro, Maliana no Suai no sei atribui ba munisípiu hotu, iha teritóriu tomak. Ina