CNRT konsidera sesta bázika benefísia ba grupu balun deit

Xefe bankada CNRT, Duarte Nunes, konsidera polítika sesta bázika ne’ebé Governu implementa benefísia de’it grupu balun, liu-liu ekipa ne’ebé distribui sasan ba komunidade, tanba osan perdiem ne’ebé hetan la balansu ho folin sasán ne’ebé fahe ba komunidade.

“Dalaruma intensaun ne’e atu benefísia sira fahe sesta bázika ne’e, ne’ebé ita akompaña de’it”, afirma deputadu opozisaun ne’e ba GMN iha Parlamentu Nasionál (PN), Sesta (06/11/2020).

Nune’e, deputadu CNRT ne’e dúvida ho polítika ka programa sesta bázika refere, tanba pagamentu subsídiu kada uma-kain ho montante USD 100 ba fulan rua nian ne’ebé Governu halo ona, maibé kuaze populasaun uma-kain rihun 15 liu mak seidauk konsege hetan.

“Sira-nia teoria ne’e dehan bele, maibé ezemplu ida mak subsídiu USD 100 ba família de’it to’o agora barak mak seidauk hetan”, dehan Duarte.

Alénde ne’e, deputadu bankada FRETILIN, Joaquim dos Santos, esplika, polítika sesta bázika ne’ebé Governu halo atu rekupera ekonomia husi baze, liu-liu tanba Governu identifika ona problema ne’ebé povu kontinua hasoru durante tinan 10, inklui impase polítika ho COVID-19.

“Sesta bázika ne’e di’ak, tanba  bele ajuda komunidade balun para hetan apoiu husi Governu hodi dezenvolve sira-nia agrikultura, bele mós trava osan barak sai ba liur”, tenik Xefe bankada CNRT ne’e.

Maske nune’e, Governu presiza reforsa rekursu no hasa’e produsaun agrikultura, nune’e labele lakon espasu.

Polítika sesta bázika ne’e Oitavu Governu hahú implementa ona iha inísiu fulan Novembru, tinan ne’e, nu’udár parte ida husi planu rekuperasaun ekonómika. Say