JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

CNRT: PR Lú Olo curhat nia erru iha diskursu 28 de Novembro

CNRT: PR Lú Olo curhat nia erru iha diskursu 28 de Novembro

Bankada CNRT konsidera Prezidente Repúblika (PR), Francisco Guterres “Lú Olo” ninia diskursu iha loron komemorasaun 28 de Novembro 2020 ne’e hanesan curhat nia erru sira no atu justifika aktu polítika extra-konstitusionál ne’ebé nia komete dezde tinan 2017 to’o 2020.

“Xefe Estadu iha nia diskursu afirma katak Konstituisaun la bandu Governu minoria FRETILIN ukun iha 2017, ho razaun katak Governu minoria mós mosu iha Portugál. Maibé Lú Olo la mensiona katak Governu minoria iha Portugál hetan apoiu maioria iha Asembleia Repúblika liu husi insidénsia parlamentár. Governu minoria FRETILIN-PD iha 2017 la hetan apoiu maioria parlamentár, tanba opozisaun CNRT-PLP-KHUNTO mak iha fali maioria parlamentár, tuir loloos PR tenke tetu situasaun ida ne’e antes fó pose ba VII Governu. PR Lú Olo nia diskursu ba Estadu ne’e hanesan fali diskursu Prezidente partidu FRETILIN ba militante sira. Nia promesa katak bainhira eleitu nia sei sai Prezidente ba povu tomak ne’e hela ba retórika de’it. Tanba realidade hatudu katak desizaun PR favorese liu ba partidu FRETILIN, maske desizaun sira ne’e viola momoos Konstituisaun da RDTL”, Vise Xefe bankada CNRT, Patrocínio Fernandes liu husi konferénsia imprensa iha Parlamentu Nasionál, Segunda (30-11-2020).

Tuir CNRT nia haree, diskursu Xefe Estadu nian ne’e hanesan fó kulpa ba sidadaun sira seluk hodi interpreta Konstituisaun la tuir dalan loloos. Maibé realidade hatudu katak PR nia interpretasaun ba Konstituisaun RDTL mak hala’i liu ba oinsá fó vantajen no fó benefísiu ba partidu FRETILIN.

“Bankada CNRT hare’e katak desizaun PR ne’ebé nakonu ho tendénsia polítika, hodi fó benefísiu ba FRETILIN, tanba hahú kedas iha tinan 2017 PR Lú Olo fó pose ba Primeiru Ministru (PM) Governu minoritáriu FRETILIN, ikus mai programa VII Governu minoria xumba iha PN, tanba laiha apoiu maioria parlamentár tuir Konstituisaun haruka. Ho nune’e desizaun Xefe Estadu ida ne’e viola Konstituisaun RDTL artigu 106 númeru 1 ne’ebé hateten, PM hili husi partidu ne’ebé iha votu barak liu ka aliansa partidu sira ne’ebé iha nia ema barak liu iha PN no iha nomeasaun husi PR mak PR obriga fó pose ba Sekretáriu Jerál FRETILIN, Mari Alkatiri sai PM koligasaun FRETILIN-PD laiha maioria parlamentár, ikus mai VII Governu ne’e monu, tanba laiha kbi’it atu halo pasa nia programa iha PN. Xefe Estadu nia diskursu hodi defende-an iha 28 de Novembro 2020 hateten, PR laiha obrigasaun atu aseita PM nia demisaun no argumenta katak tuir loloos PN mak tenke aprova mosaun sensura hasoru PM”, tenik deputadu bankada CNRT ne’e.

Nia akresenta, ho nune’e bankada CNRT haree katak argumentu ida ne’e laiha fatin, tanba iha 24 de Fevereiro 2020 PM, Taur Matan Ruak voluntariamente hato’o ona nia demisaun ba PR ho razaun katak, Aliansa Mudansa ba Progresu (AMP) ne’ebé nomeia PM mate tiha ona.

“Tuir Konstituisaun RDTL artigu 112 númeru 1 alínea (b) hateten, Governu nia kna’ar remata bainhira PR simu demisaun husi PM. Ho nune’e bankada CNRT haree katak, laiha razaun ba PR atu la simu demisaun ne’ebé PM voluntariamente hato’o ona ba PR, sá tan PR kontinua hein no ezije AMP foun atu halo demisaun ba PM ne’ebé voluntariamente rezigna-an tiha ona. Ida ne’e violasaun grave ba konstituisaun ne’ebé hanaruk krize polítika konstitusionál iha Timor-Leste”.

“Iha diskursu Francisco Guterres “Lú Olo” argumenta katak, Konstituisaun la fó prazu ba Xefe Estadu atu deside kona-bá Xefe Governu nia demisaun, ida ne’e interpretasaun ne’ebé iha liu tendénsia polítika atu fó fatin ba FRETILIN integra iha Governu. Tanba realidade hatudu katak, PM Taur Matan Ruak hato’o nia demisaun ba PR, PR rasik mak foti inisiativa halo reuniaun ho partidu sira ho asentu parlamentár atu buka malu hodi forma Governu foun ka IX Governu Konstitusionál. Husi inisiativa PR nian ne’e konsege mosu Aliansa Maioria Parlamentár (AMP) foun kompostu husi CNRT-KHUNTO-PD-FM/UDT-PUDD ho kadeira 34 ne’ebé nomeia maun boot Kay Rala Xanana Gusmao ba PM. Maibé PR ignora tiha de’it AMP foun ne’ebé kumpre ona Konstituisaun RDTL artigu 106 númeru 1. Desizaun Prezidente nian ignora AMP foun ne’e grave violasaun ba Konstituisaun RDTL artigu 106 númeru 1”, realsa Patrocínio.

Ho nune’e, bankada CNRT konklui katak PR Lú Olo mak hun no abut loloos ba violasaun konstituisaun, povu tomak komesa komprende situasaun ida ne’e ho di-di’ak apenas PR sei buka atu aproveita nafatin momentu solene Estadu nian, hodi halo Defesa da Honra no so’e fali kulpa ba partidu CNRT no maun boot Kay Rala Xanana Gusmão.

“PR para ona ho kári rai-rahun ba povu nia matan, povu hatene momoos sé mak viola Konstituisaun RDTL durante ne’e. PR nia Defesa da Honra no argumentu sira hodi defende-an liu husi diskursu ba Estadu iha 28 de Novembro 2020 ne’e laiha valór, tanba povu tomak rona rasik ona deklarasaun Sekretáriu Jerál FRETILIN Mari Alkatiri ne’ebé hateten, Fretilin ko’a dalan Konstituisaun nian hodi sai ai-tongka ba VIII Governu, tanba konstitusionalmente maun boot Kay Rala Xanana Gusmao lais liu no aprezenta tiha ona lista IX Governu nian ba PR”, dehan Vise Xefe bankada CNRT ne’e.

Atu termina, bankada CNRT mós husu ba povu tomak atu iha eleisaun prezidensiál 2022 eskolla ema ne’ebé defende Konstituisaun RDTL no halo tuir de’it prinsípiu Estadu Direitu Demokrátiku. ety

Lee hotu :   CNRT acusa FRETILIN de impedir integração de Arão em comissões parlamentares

Add to Comments Here!!!!

error: Content is protected.
Secured By miniOrange
You might also like:
Komunidade Lacluta sunu sasán sesta bázika tanba la tuir presu merkadu

Sasán ba sesta bázika ne’ebé Centro...

PN hahú diskute OJE 2021 billiaun USD 1.895, PM Taur: Sei fó resposta ba dezafiu sira

Deputadu Kinta Lejislatura Parlamentu Nasionál (PN)...

PN ladauk simu relatóriu ezekusaun OJE 2020

Reprezentante povu iha uma fukun Parlamentu Nasionál...

Close