Komemora loron nasionál feto iha Timor-Leste (TL), Governu ida ne’e kompremitidu tau ema nu’udár sentru ba dezenvolvimentu, nune’e sei halo esforsu hotu hodi envolve inan-feton sira iha prosesu dezenvolvimentu Timor-Leste (TL).
Primeiru Ministru (PM), Taur Matan Ruak, hateten, loron 3, fulan Novembru, kada tinan sai loron espesiál ba inan-feton sira iha TL, loron ne’ebé Governu deside nu’udár loron nasionál ba feto TL.
“Loron ne’e konsidénsia ho loron mate eroína boot Maria Tapó, nu’udár onra ba feto Timor-Oan hotu ne’ebé ho dedikasaun tomak no barani hodi hamri’ik hamutuk ho asua’in mane sira iha luta kontra okupasaun estranjeira durante tinan 24, ne’ebé ikus mai ita sai duni nasaun ida livre no independente”, lia hirak ne’e hato’o husi PM, Taur Matan Ruak, ne’ebé GMN asesu husi Gabinete PM, Tersa (03/11/2020).
Xefe Governu ne’e hatutan, loron 3, fulan Novembru, nu’udár loron reflesaun atu ema hotu reflete kona-bá importánsia papél inan-feton sira iha prosesu dezenvolvimentu nasionál que inan-feton sira dezempeñadu dezde tempu luta.
Taur Matan Ruak, subliña, haree ba feto nia papél ne’ebé importante, Governu harí Sekretaria Estadu Igualdade no Inkluzaun, servisu hamutuk ho organizasaun feto, oinsá tau matan no valoriza inan-feton sira iha prosesu dezenvolvimentu nasionál ida ne’e, atu inan-feton sira labele sente hela iha kotuk.
“Nune’e aproveita loron ida ne’e, hodi Oitavu Governu Konstitusionál nia naran no ho ha’u nia naran rasik, kongratula inan-feton sira iha TL, ba loron espesiál ida ne’e”, tenik PM ne'e. cin
