MNEK briefing PR Lú Olo ba adezaun TL iha ASEAN

Ministra Negósiu Estranjeiru no Kooperasaun (MNEK), Adaljiza Magno, hateten, sira hahú fó briefing ba Prezidente Repúblika (PR), Francisco Guterres Lú Olo, iha aspeitu polítika kona-bá adezaun Timor-Leste (TL) nian ba Association of Southeast Asian Nations (ASEAN).

“Ami mai briefing PR kona-bá ita-nia prosesu adezaun ba ASEAN, tanba prosesu ne’e la’o di’ak loos ona, depois iha simeira iha loron hira liu bá ne’ebé iha mudansa husi lideransa Vietnam ba Brunei Darussalam. Tanba ne’e, fulan oin servisu tékniku nian hodi lori TL ba ASEAN hotu ona, tanba ne’e MNEK hahú diskute no briefing ba PR Lú Olo no mós Primeiru Ministru (PM) no Prezidente Parlamentu Nasionál (PN) hodi lian ida ba polítika TL nian ba ASEAN”, MNEK ne’e iha Palásiu Prezidensiál Bairro Pité, Díli, Segunda (16/11/2020).

Adaljiza akresenta, iha okaziaun ne’e ASEAN fó statement ne’ebé favorese loos ba TL nia prosesu adezaun nian, depois sira la’ós atensaun ba TL nia preparasaun de’it, maibé ba tékniku sira mós. Tanba ne’e, iha loron 7 no 8, fulan Dezembru, sei iha última konferénsia virtuál kona-bá pilar ekonomia ninian, entaun iha momentu ne’ebá servisu tékniku ninian hotu ona.

“Agora ita esforsu mak halo polítiku, tanba ne’e mak ami mai ko’alia ho PR, depois ko’alia tan ho PM no Prezidente PN para ita bele iha asaun no lian ida de’it, para oinsa ita halo esforsu hamutuk iha área polítika nian, hodi aselera ita-nia prosesu adezaun ba ASEAN,” tenik Governante ne’e.

Ministra ne’e fundamenta, PR Lú Olo mós kontente, tanba esforsu tékniku no liña ministeriál sira konsege iha ona rezultadu balun.

“Prezidente kontente tebes ho prosesu ne’ebé iha ona, purtantu PR apoiu ba esforsu ne’ebé mak MNEK ho liña ministeriál sira seluk halo ona, tanba ne’e PR prontu ajuda iha parte polítika ninian”, dehan Adaljiza. oly