PD husu MOP-ADN halakon konflitu ba projetu

Reprezentante povu iha uma fukun Parlamentu Nasionál (PN), liu-liu bankada PD husu ba Ministériu Obras Públika (MOP) no Ajénsia Dezenvolvimentu Nasionál (ADN), atu halakon konflitu, tanba projetu.

“Ha’u husu atu hamate ona konflitu ka polémika ADN ho MOP, tanba instituisaun rua ne’e atu serví la’ós atu satan malu, ha’u rona katak MOP haruka ema halo projetu, emprezáriu halo ADN lakohi sertifika problema la’ós hanesan ne’e, sé hanesan ne’e lalika halo tenderizasaun, nune’e emprezáriu sira lalika hasa’i osan, sé problema prosedimentu entre ADN ho MOP ita-nia problema agora kria kampu servisu no hatama reseita. Ha’u hato’o lamentasaun liu-liu MOP ne’ebé bele tama ona Ministériu Planu no Ordenamentu, kestaun servisu kna’ar ADN ho MOP tuir ami nia fiskalizasaun ami rona Diretór sira iha munisípiu hanesan busa ho laho hafuhu malu satan malu no lasu malu”, Deputadu bankada PD, Adriano do Nascimento, liu husi nia intervensaun bainhira komisaun E ho C hala’o audénsia ho Segundu Vise Primeiru Ministru, José Reis ho ninia ekipa iha Parlamentu Nasionál, Kuarta (11-11-2020).

Tanba ne’e, Adriano akresenta, Ezemplu mak projetu balun MOP aprova, maibé ADN la aprova, no ADN aprova MOP kestiona fali, ho nune’e mak dada emprezáriu sira atu halo ninia obra no impede emprezáriu lokál atu hetan pagamentu.

“Realidade ami halo fiskalizasaun projetu iha munisípiu Ainaro MOP hateten, projetu balun sira la hatene ADN mak hatene, laiha kooperasaun, tanba saída hanesan ne’e, ha’u hetan keixa husi emprezáriu lubuk ida hein hela pagamentu ba projetu 2019, pedidu pagamentu 2019 to’o agora Governu seidauk selu. Ha’u preokupa iha nasaun ida ne’e ita iha problema projetu 143 ne’ebé hamate emprezáriu nasionál sira. Maske emprezáriu sira halo ona obra Governu la selu, maske hela de’it ona projetu 40 resin, maibé sira empresta osan husi banku no individual balun aluga ema nia kareta funan ne’e sa’e ba bei-beik, projetu hahú 2019 to’o agora seidauk selu. Ida ne’e hatodan emprezáriu lokal sira hasa’i sira-nia kapital depois Governu la selu”, tenik Deputadu bankada PD ne’e.

Tuir Segundu Vise Primeiru Ministru, Jose Reis, klarifika, Ajénsia Dezenvolvimentu Nasionál (ADN) mantein ninia papel halo verfikasaun ba kualidade infraestrutura.

“Liga ba estatutu ADN nian ami aprova agora sei iha hela Prezidente Repúblika (PR) sei prosesu promulgasaun, maibé misaun ADN ami mantein halo verifikasaun, hodi garante kualidade infraestrutura iha Timor-Leste”, klarifika José Reis.

Husi parte seluk, Ministru Obras Públika, Salvador Pires, hateten, koordenasaun ADN ho MOP la’o di’ak hela. ety