PM rekoñese programa Sesta Bázika la tuir promesa Governu

Primeiru Ministru (PM), Taur Matan Ruak, rekoñese programa Sesta Bázika la tuir promesa Governu nian kona-bá kada ema ida sei hetan USD 25, tanba povu barak hahú halo lamentasaun oi-oin.

“Ha’u mós haree no rona komunidade sira manifesta, mas ha’u hanoin Ministériu sira ne’ebé toma konta ba atividade ida ne’e kada loron sira iha terenu, sira sei haree saída mak bele hadi’a esperiénsia foun ne’ebé foin hahú, ne’ebé implementa iha tempu naruk, ne’ebé la’ós membru Governu de’it mak envolve”, dehan PM Taur iha Palásiu Prezidensiál Nicolau Lobato, Bairro Píte, hafoin remata enkontru semanál ho Prezidente Repúblika (PR), Francisco Guterres “Lú Olo”, Kinta (26/11/2020).

Xefe Governu ne’e hatutan, la’ós membru Governu de’it, maibé envolve mós husi ajénsia no emprezáriu sira ne’ebé ajuda fahe produtu sira ne’e, entaun Governu iha nosaun ida ne’e para hadi’a liu tán, depois enkoraja mós instituisaun sira ne’ebé halo kontrolu, para kontrola maka’as liu tán.

PDHJ, CAC, Inspetoria Jerál no instituisaun sira seluk ne’ebé hotu-hotu ko’alia, entaun ho hanoin ida katak sei hadi’a di’ak liu, mak sei halo ema hotu kontente.

Entretantu, programa sesta bázika ne’e Governu liu husi ministériu relevante sira hahú lansa ona iha munisípiu sira, hanesan Covalima, Bobonaro, Díli, ho produtu sira ne’ebé Governu uza iha programa sesta bázika hodi rekupera ba ekonómia povu nian mak hanesan foos, mina Bimoli, manu-tolun, fore-mungu, koto, masin, Rinso, pasta dente no seluk tan. oly