PN adia ajenda eleisaun ba membru KI

Sekretária Meza Parlamentu Nasionál (PN), Lídia Norberta, informa, PN adia ajenda eleisaun ba membru Konsellu Imprensa (KI), relasiona ho petisaun husi jornalista na’in 31, tanba Komisaun A PN presiza esklaresimentu kona-bá prosesu eleisaun Asosiasaun Jornalista Timor-Leste (AJTL).

“Kona-bá eleisaun ba membru KI hanesan ita-boot sira hatene nia kuadru atu tama iha ne’ebá agora prosesu pendente hela, ita-boot sira karik nusa mak buat ne’e adia hela de’it iha PN, iha Gabinete Prezidente PN nian no komisaun A mós simu petisaun husi jornalista sira, relasiona ho kandidatu balun”, Sekretária meza PN ne’e liu husi konferénsia ba imprensa iha PN, Sesta (20-11-2020).

Lídia subliña, relasiona ho petisaun husi jornalista na’in 31 ne’e komisaun A ne’ebé trata asuntu kontitusionál no justisa presiza hetan esklaresimentu ruma.

Maske komisaun A haruka ona karta ba membru konselleiru KI atuál Prezidente KI, Virgílio Guterres, maibé to’o ohin loron seidauk iha resposta.

Jornalista 31 ne’e hato’o ona petisaun ba PN, Prezidente Tribunál Rekursu, Ministru Asuntu Parlamentár no Komunikasaun, Sekretariadu Estadu Komunikasaun Sosiál, tanba kestiona legalidade eleisaun ne’ebé KI organiza iha loron 4, fulan Jullu, tinan 2020. ety