JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN kestiona Governu la inklui planu harí terminál iha OJE 2021

PN kestiona Governu la inklui planu harí terminál iha OJE 2021

Deputadu bankada CNRT, Marcos Xavier, kestiona, Governu promete tiha atu harí terminal ida di’ak, hodi muda terminal Becora ho Tasi-tolu, maibé Governu rasik la inklui iha proposta Orsamentu Jerál Estadu (OJE) tinan 2021.

Tanba tuir deputadu opozisaun ne’e, espasu iha terminál Bekora ho Tasi-tolu ne’e la sufisiente ona, hodi akumula transporte públiku hotu.

“Señor Ministru Ministériu Transporte no Komunikasaun (MTK) nia intervensaun iha tempu liu-bá hateten katak, sei muda terminál Becora ho Tasi-tolu iha 2021, maibé ha’u haree iha livru ne’e laiha orsamentu ruma prevé iha ne’e. Sé ita ko’alia hakarak halo, maibé la prevé orsamentu ne’e ita bosok povu mak ne’e, povu hein hela promesa”, Deputadu bankada CNRT ne’e iha audénsia entre MTK ho komisaun E no C, Kuarta (11/11/2020).

Alénde ne’e, deputada bankada KHUNTO, Irene Gonzaga, mós reforsa katak,  Governu presiza buka espasu ne’ebé sufisiente hodi muda ona terminál Becora, tanba halo engarafamentu bei-beik. Maske problema kona-bá terminál ne’e levanta bei-beik ona, maibé orsamentu la prevé iha proposta 2021 ne’e.

Maske nune’e nia dehan, orsamentu refere tenke prevé iha tinan 2022, tanba terminál agora ne’e kareta barak demais, terminál Becora ne’e fatin ida klo’ot, bus ho mikrolete no táxi sira para hotu iha ne’ebá, hamosu engrafamentu.

“Tanba ne’e bus husi Lospalos rasik agora la para ona iha ne’ebá, la hatene autorizasaun husi sé mak Bus Lospalos ba para fali iha tasi-ibun, maibé razaun ida mak fatin iha terminál Becora ne’e klo’ot”, tenik deputada Irene.

Hatán ba preokupasaun ne’e, Ministru Transporte no Komunikasaun, José Agustinho da Silva, hateten, terminál Becora ho Tasi Tolu sei iha faze koordenasaun, tanba ne’e seidauk serteza.

“Terminál Becora ho Tasi Tolu ne’e iha ona planu atu muda, Tasi Tolu atu muda ba Tibar, maibé sei iha faze koordenasaun, Terminal rejionál Manleuana ne’ebé  mak atende ba parte rai klaran ninian, ida ne’e sei mantein”, subliña Governante ne’e.

Dadaun ne’e, transporte públiku hanesan bus, mikrolete no angguna husi parte leste konsentra iha terminál Becora, maibé bus husi Lospalos konsentra de’it iha tasi-ibun Praia dos Coqueiros no transporte públiku husi parte oeste konsentra iha Tasi-tolu.

Alénde ne’e transporte públiku parte rai klaran, konsentra iha Taibessi. say

Lee hotu :   Pertamina Internasional Timor apoia tanke be’e rua ba SIJK

Add to Comments Here!!!!

error: Content is protected.
Secured By miniOrange
You might also like:
Lú Olo: Líder sira-nia unidade la hanesan uluk ona

Prezidente Repúblika (PR), Francisco Guterres “Lú...

Xanana: Juventude sira-nia mate atu harí, konsolida no ema hotu hakru’uk ba konstituisaun

Líder karismátiku, Kay Rala Xanana Gusmão,...

Implementa servisu militár obrigatóriu, PR Lú Olo sei ko’alia ho PM Taur

Relasiona ho aprovasaun dekretu lei númeru...

Close