Semana oin, Rui Gomes simu pose nu’udár MF

Primeiru Ministru (PM), Taur Matan Ruak, hatete, Segunda semana oin, Rui Gomes, sei simu pose hodi substitui Fernando Hanjam hanesan Ministru Finansas (MF).

Asuntu ne’e deklara husi PM, Taur Matan Ruak, iha Palásiu Prezidensiál,Tersa (17/11/2020), hafoin enkontru semanal ho Prezidente Repúblika (PR), Francisco Guterres “Lú Olo”.

Taur hateten, Xefe Estadu aseita ho substituisaun Rui Gomes ba MF no konfirmadu Segunda semana sei realiza serimónia tomada de posse ba Rui Gomes, hodi troka Fernando Hanjam ne’ebé labele kontinua servisu nu’udár MF, tanba hala’o hela tratamentu saúde.

“Ha’u ko’alia ona ho sua selénsia kona-bá substituisaun Rui Gomes ba kargu MF hodi troka atuál MF, Fernando Hanjam, no konfirma ona katak, ami marka ba Segunda feira sei fó pose. Razaun troka Fernando Hanjam husi MF, tanba nia kondisaun saúde la permite atu kontinua servisu, nia halo hela tratamentu, tanba ne’e mak nia sei deskansa hela”, dehan Xefe Governu ne’e.

Tuir informasaun antes ne’e, MF, Fernando Hanjam hatama ona karta rezignasaun ba PM, maibé iha loron 14, fulan Outubru, tinan ne’e, Ministru Prezidénsial Konsellu Ministru  rejeita fó informasaun. oly