Timor-Leste hahú negosiasaun atu adere ba OMK

Konsellu Ministru (KM) iha Kuarta (25/11/2020) aprova ona deliberasaun mandatu ba negosiasaun adezaun Timor-Leste ba Organizasaun Mundiál Komérsiu (OMK) ne’ebé aprezenta husi Ministru Koordenadór Asuntu Ekonómiku (MKAE), Joaquim Amaral. Ho deliberasaun ne’e mak autoriza ona negosiasaun adezaun Timor-Leste ba OMK no fó kompeténsia tomak ba MKAE, Joaquim inísia prosesu negosiasaun atu adere ba OMK.

“Iha deliberasaun ne’e Departamentu Governamentál sei indika sira-nia reprezentante atu bele hola parte iha ekipa MKAE nian. Husi parte Prezidénsia Konsellu Ministru nian husi Gabinete apoiu jurídiku nian mak sei hola parte. Tanba adezaun ba iha OMK ne’e iha komponente legál barak. Entaun presiza iha prosesu atu adere ne’e ita haree di-di’ak ita-nia kuadru legál sira no sé wainhira nesesáriu ita halo adaptasaun ba rekezitu sira OMK nian. Wainhira ita-nia kuadru legál iha rai-laran iha ona karik, ita bele informa ba OMK. Ita fiar katak presesu ne’e sei la’o ho di’ak”, Ministru Prezidénsia Konsellu Ministru (MPKM), Fidélis Leite Magalhães.

Iha nia mandatu hanesan negosiadór adezasaun Timor-Leste nian ba OMK, Ministru Joaquim sei hetan apoiu husi delegasaun ida ne’ebé kompostu husi membru reprezentante sira husi kada Departamentu Governu nian hanesan Prezidénsia Konsellu Ministru, Ministériu Finansa, Ministériu Negósiu Estranjeiru no Kooperasaun, Ministériu Saúde, Ministériu Turízmu Komérsiu no Indústria, Ministériu Agrikultura no Peska no Ministériu Petróleu no Minerál.

Entretantu OMK hanesan organizasaun ne’ebé ho objetivu atu superviziona no liberaliza komérsiu internasionál no lidera regulamentu sira komérsiu nian, entre nasaun membru sira. oct