CNRT: Ikus ne’e Marí Alkatiri ódiu loos Maun Bo’ot Xanana

Xefe bankada CNRT, Duarte Nunes, hateten, ikus-ikus ne’e Sekretáriu Jerál partidu FRETILIN, Marí Bin Amude Alkatiri ódiu loos Maun Bo’ot Kay Rala Xanana Gusmão, hodi hasa’i deklarasaun extremu hasoru Maun Bo’ot Xanana. Maibé Maun Bo’ot Xanana la liga.

Tanba ne’e, Duarte Nunes, afirma, hahalok ida hanesan Marí Alkatiri nian ne’e difísil atu hamutuk, bainhira nafatin rai ódiu ba malu, maske deputadu sira sempre hakilar iha Parlamentu Nasionál (PN) katak, hakarak díalogu no hamutuk.

“Marí ho Ma’un Bo’ot ne’e hanesan kompadre sira riba malu, tempu liu-bá ne’e normál, agora ho situasaun ida hanesan ne’e, la hatene tanba saída mak nia (Marí) hirus loos ne’e, hanesan ódiu loos maun Xanana. Uluk dehan sira kompadre, maibé agora ikus ne’e odíu malu loloos, maibé nia (Marí) mak odíu maun Xanana, maun Xanana nonook hela. Nia (Xanana) halo nia asaun karitativa mós, nia (Marí) tarata, agora ema moras mós tarata nafatin, ha’u la hatene intensaun saída? husu ba maun Marí, nia hakarak saída ho maun Xanana? Ita ko’alia iha plenária PN dehan, ita tenke hamutuk, maibé realidade la’e. Maneira hanesan ne’e mak dehan hakarak hamutuk, hamutuk oinsa se loro-loron mak tarata ema. Hanesan ó atu ba  hola feto ida, maibé ó tarata nia loro-loron halo nusa mak ita atu gosta fali ó”, Deputadu opozisaun ne’e ba jornaslista sira iha PN, Kinta (10/12/2020), ligadu ho deklarasaun ka publikasaun husi Marí Alkatiri iha Facebook durante impase polítiku.

Antes ne’e mós fó sai husi média sosiál balun, Sekretáriu Jerál partidu FRETILIN, Marí Alkatiri, bainhira sai oradór iha komemorasaun 7 de Dezembro ou loron invazaun Indonézia mai Timor-Leste, iha Comite Central da FRETILIN (CCF) Segunda (7/12) katak, Xanana Gusmão presiza hetan edukasaun sívika.

Bainhira Jornalista tenta konfirma ho deputadu sira husi bankada FRETILIN, maibé deputadu hirak ne’e lakohi fó komentáriu. say