Governu identifika ona bairu foun ba komunidade kapitál Díli

Governu liu husi Ministériu Obras Públika (MOP) identifika ona rai iha Hera, Comoro no Becora, hodi hari’i bairu foun ba komunidade sira iha kapitál Díli.

Ministru Obras Públika, Salvador Soares dos Reis Pires, informa iha tinan rua nia-laran Governu halo ona estudu viabilidade no mós modalidade finansiamentu atu implementa projetu ordenamentu teritóriu iha Díli.

“Atu implementa projetu futuru sidade Díli iha konteksu dezenvolvimentu sustentavel ita halo ona estudu viabilidade no mós modalidade finansiamentu durante tinan rua nia-laran antes atu implementa projetu hari’i bairu foun ba komunidade iha kapitál Díli ne’ebé ita identifika ona rai iha Hera, Comoro no Becora atu hari’i bairu foun iha sidade Díli ba komunidade sira, nune’e Governu bele halo ordenamentu teritóriu hodi dezenvolve sidade Díli ho di’ak”, Ministru Obras Públika ne’e ba GMN iha otél Novo Turismo, Díli, Tersa (15/12/2020), hafoin abertura semináriu ordenamentu territóriu ho tema ‘Futuru Sidade Díli, Dezafiu no solusaun sira iha konteksu Dezenvolvimentu sustentavel.

Salvador konsidera, semináriu ne’e importante ba MOP atu fahe imformasaun kona-bá ordenamentu teritóriu ba dezenvolvimentu nasionál.

“Presiza halo semináriu hodi akumula estudante intelektual sira no peritu, matenek na’in sira atu fó hanoin ba malu, hodi tau hamutuk hanoin ida de’it, hodi dezenvolve kapitál Díli liu husi halo projetu ordenamentu teritóriu, nune’e sidade Díli sai sidade ida ne’ebé mais organizadu”, tenik Ministru Obras Públika ne’e.    

Iha fatin hanesan, Aurelio Guterres ne’ebé sai oradór iha semináriu ne’e, hateten, Governu tenke kria polítika dezentralizasaun ba munisípiu sira, hodi halo dezenvolvimentu rurál, nune’e ema hotu labele mai iha kapitál Díli.

“Atu sidade Díli ne’e moris ho organizadu primeiru tenke kria no implementa polítika dezentralizasaun no dezenvolvimentu rurál tenke la’o separa ho nasionál, nune’e presiza hari’i universidade iha munisípiu sira, loke servisu ba juventude sira, hadi’a merkadu munisipál sira, nune’e ema hotu labele mai hotu iha Díli”, tenik Aurelio.

Antes ne’e MOP prepara ona esbosu lei númeru 6, iha loron 19, fulan Abril, tinan 2017, ne’ebé fó dalan atu halo verifikasaun urbanizasaun bazeia ba lei espesífiku sira hanesan kódigu sivíl no klasifikasaun ho planeamentu teritoriál. aba