Governu taka ona sistema ezekusaun OJE 2020

Ministru Prezidénsia Konsellu Ministru (MPKM), Fidelis Leite Magalhães, informa, Governu liu husi Konsellu Ministru (KM) iha loron 17, fulan Dezembru, tinan 2020, deside taka ona sistema ezekusaun Orsamentu Jerál Estadu (OJE) tinan 2020.

“KM aprova projetu dekretu Governu kona-bá alterasaun dahuluk ba dekretu Governu númeru 14/2020, loron 23, fulan Outubru, ko’alia kona-bá ezekusaun OJE 2020”, MPKM ne’e ba jornalista sira iha Palásiu Governu, Kuarta (16/12/2020).

Porta Voz Governu esplika, ho aprovasaun ida ne’e loke dalan atu sistema bele loke to’o ohin (17/12) loron, tanba iha servisu barak ne’ebé tenke rezolve para bele halo sasán hirak ne’e ho forma organizadu liu no fasilita ezekusaun ida ne’ebé di’ak.

“Tuir dekretu ida antes ne’e hatur katak, sistema ezekusaun taka iha Kinta (10/12/2020), maibé Governu loke fila-fali to’o loron 17, fulan Dezembru, ida ne’e sei fasilita liu Diresaun Jerál sira, atu bele organiza sira-nia-an no asegura ezekusaun ne’ebé di’ak”, tenik Fidelis.

Tuir nia, iha tinan ne’e orsamentu barak, entaun prosesu sira tu-tuir malu de’it, ho nune’e presiza organiza ho di’ak.

Kada tinan sistema iha periódu ida, data iha Governu nian dehan, sistema sei taka iha Kinta (10/12/2020), maibé ezekusaun sei lao hela no orsamentu tu-tuir malu deit, ho ida ne’e Ministru Finansa (MF) propoin muda ba loron 17, fulan ne’e.

“MF ho nia ekipa halo esforsu hotu para Governu disiplina iha nia ezekusaun sira, tanba ne’e laiha intensaun ida atu loke sem fim, maibé to’o loron 17, fulan ida ne’e, depois ba oin ne’e Governu konsolida nia relatóriu sira”, afirma MPKM ne’e. cin