Limita direitu deputadu, CNRT la envolve iha desizaun OJE 2021

Vise Xefe bankada CNRT, Patrocínio Fernandes, informa, razaun bankada CNRT la envolve iha desizaun aprova Orsamentu Jerál Estadu (OJE) tinan 2021, tanba durante diskusaun Prezidente Parlamentu Nasionál (PPN), Aniceto Guterres, limita direitu deputadu opozisaun sira  atu kontribui opiniaun, hodi halo diskusaun.

“Ponto de ordem sira de’it mós la fó direitu ba ponto de ordem hodi halo defesa de honra ba atake ruma hasoru ema nia pesoál partidu mós la fó, halo pedidu esklaresimentu deklarasaun ruma ne’ebé halo konfuzaun públiku PPN la fó tempu ba ida ne’e. Ami hanoin katak ami labele hola parte iha ne’e, alende mós bankada CNRT la komfortabel tur iha laran kleur, tanba rai kalan ami hetan ameasa, tanba deklarasaun husi bankada Governu nian kona-bá termu sira ne’ebé ami uza kona-bá de facto no viabilizasaun ne’ebé la’ós ami nia vokabuláriu“, deputadu bankada CNRT ne’e liu husi konferénsia imprensa iha Parlamentu Nasionál (PN), Kuarta (02-12-2020).

Tuir Patrocínio, razaun seluk bankada CNRT lakohi envolve iha desizaun aprova OJE tinan 2021, tanba Komisaun A PN deteta proposta OJE ne’e inkonstitusionál.

To’o notísia ne’e publika, GMN seidauk hetan konfirmasaun husi PPN, Aniceto Guterres, relasiona ho preokupasaun bankada CNRT ne’e. ety