Lori kadoras GS mai Timor-Leste, ACBN husu povu tomak hili Xanana

Fundadór Asosiasaun Kombatentes Brigada Negra (ACBN-sigla Portugés), Avelino Coelho, husu ba povu tomak atu hili fali líder karismátiku Kay Rala Xanana Gusmão, atu nune’e nia bele lori kadoras Greater Sunrise (GS) mai Timor-Leste.

Tuir Avelino Coelho, povu mak hili hili sala líder iha eleisaun prezidensial tinan 2022 sei fó impaktu bo’ot ba dezenvolvimentu ekonómiku no polítiku, tanba ukun-an ne’e mai husi povu.

Fundadór ACBN Avelino Coelho hato’o asuntu ne’e bainhira partisipa semináriu ne’ebé organiza husi Asosiasaun Kombatentes Brigada Negra ho Movimentu Kamponezes Timor-Leste (MOKATIL) iha Munisípiu Aileu.

Avelino Coelho husu ba povu MKTL no membru ACBN atu hili líder ne’ebé iha kapasidade hodi dada kadoras greater sunrise mai Timor-Leste nune’e bele hadia povu nia moris.

“Ha’u hein katak iha tinan 2022 membru ACBN no MOKATIL organiza povu kbiit laek sira atu hili líder Karismátiku Kay Rala Xanana Gusmão atu ukun, nune’e bele dada kadoras mai Timor-Leste nune’e povu nia produtu bele iha folin ho di’ak hodi hadia povu nia moris sekarik kadoras la mai ita nia fehuk la folin modo la folin inklui produtu sira seluk. Tanba ne’e atu ita-nia produtu sira hakarak folin tenke hili ema ida ne’ebé mak iha fuan boot ba nia povu para bele hadia povu nia moris”,hateten Avelino Coelho ba GMN iha Aileu, Domingu (20/12/20).

Avelino Coelho mos konsidera Timor-Leste nia demokrasia iha no buras, maibe la funsiona ho étika.

“Demokrasia labele funsiona nune’e, demokrasia ne’e funsiona ho étika. Ema tenke hatene-an. Ha’u halo buat ruma la tuir étika no regra moe ka lae? tenke rekoñese-an ne’e mak demokrasia, mas inan-aman no alin sira ita-nia sistema mak la’o hanesan ne’e, ne’ebé tinan 55 ita ba halo eleisaun hodi hili ita-nia ukun nain atu tur hodi ukun ita, maibe povu tenke konsiensializadu. Tanba ne’e ha’u husu ba ACBN no MOKATIL atu organiza malu husi  Munisípiu  to’o Aldeia tanba MOKATIL ne’e sai hanesan payung (sumbriña) ida atu organiza povu atu halo tos no natar inklui hakiak animal nune’e bele fo resposta ekonomia familiar,”katak Avelino.    

Entretantu partisipa iha eventu ne’e laureadu nobel da paz, José Ramos Horta, José Luis Guteres, João Gonsalves, Amu Martinho Gusmão, Amu Julio Crispim, no autoridade lokal munisípiu Aileu inklui konvidadu sira seluk.aba