Minuto de silençio ba martir sira iha 7 de Dezembro

Atu dignifika martir sira ne’ebé mate iha loron invazaun 7 de Dezembro 1975, reprezentante povu iha uma fukun Parlamentu Nasionál (PN) husu ba sidadaun hotu iha Timor-Leste hodi fó 10 minuto de silençio, nune’e bele fó onra ba sira-nia luta no mate.

“Loron besik ona ha’u atu husu ba Governu, Parlamentu Nasionál (PN) no povu tomak, ha’u hakarak sujere katak tinan-tinan karik loron 7, fulan Dezembru kareta hotu tenke para, funsionáriu hotu hamri’ik nono’ok, polísia, militár no ema hotu iha Timor laran-iha ne’ebé de’it hamri’ik halo 10 minute de silençio, hodi fó onra ba ita-nia ema ne’ebé mate iha loron 7, fulan Dezembru. Sé bele ita institui buat ne’e para ita hanoin nafatin ita-nia maluk sira, tanba loron 7, fulan Dezembru ne’e hanesan momentu ne’ebé importante ba povu Timor-Leste”, Deputadu bankada FRETILIN, David Dias Ximenes “Mandati” liu husi ninia intervensaun iha diskusaun Orsamentu Jerál Estadu (OJE) tinan 2021 iha faze espesialidade iha PN, Sesta (04-12-2020).

Prezidente Parlamentu Nasionál (PPN), Aniceto Guterres, konsidera sujestaun husi deputadu David Dias Ximenes kona-bá loron 7, fulan Dezembru ne’e, sidadaun hotu hakmatek hodi fó onra ba Timor-oan sira ne’ebé mate iha loron 7, fulan Dezembru, tinan 1975.

“Ha’u sei konfirma ho Primeiru Ministru (PM), Taur Matan Ruak, ida ne’e ha’u sei ko’alia ho PM karik sujestaun ida ne’e bele konsidera“, dehan PPN ne’e.

Entretantu loron 7, fulan Dezembru ne’e nu’udár loron memória no loron ne’ebé Indonézia invade Timor-Leste iha tinan 1975. ety