OJE 2021 iha ona PR nia liman

Uma fukun Parlamentu Nasionál (PN) submete ona Orsamentu Jerál Estadu (OJE) tinan 2021 ba Prezidente Repúblika (PR), Francisco Guterres “Lú Olo”, tanba ne’e tuir lei sei fó tempu fulan ida ba PR foti desizaun.

“Ami PN aprova ona iha semana kotuk komisaun C mós konklui ona redasaun finál atu enkamiña ba Xefe Estadu atu halo promulgasaun ba OJE 2021 bazeia ba lei loron 30 ba Xefe Estadu atu haree no estudu hodi deside promulga ou lae, ne’e kompeténsia Xefe Estadu nian“, Vise Prezidente PN, Luis Roberto ba jornalista sira iha PN, Kuarta (16-12-2020).

Nia akresenta, hafoin komisaun C konklui redasaun finál iha loron 14, fulan ne’e entrega ba Prezidente Parlamentu Nasionál no iha loron ne’e kedas entrega mós ba PR Lú Olo.

“Nune’e ita fulan Janeiru ita bele ezekusaun orsamentu ho karakter normal, sé bainhira Xefe Estadu seidauk promulga OJE 2021, iha posibilidade fulan Janeiru bele la’o ho Dotasaun Orsamentu Temporáriu (DOT)”, tenik Vise Prezidente PN ne’e.

Entretantu tuir lei fó tempu ba Xefe Estadu analiza no estuda OJE 2021 durante loron 30, hafoin foti desizaun promulga ou veta.

Antes ne’e, PN aprova lei OJE 2021 ho votus a favór 44, kontra 0 no abstensaun 0. Ety