PR promulga dekretu lei bá saláriu adisionál, Opozisaun: Dekretu laiha ulun no bosok povu

Deputada bankada opozisaun CNRT, Maria Fernanda Lay, konsidera, Dekretu Lei nú 63/2020 ne’ebé promulga ona hosi Prezidente Repúbika (PR) Francisco Guterres Lú Olo, kona-bá pagamentu estraordinária ka saláriu dupla ba funsionáriu administrasaun públiku ne’e, la nesesáriu, no konsidera mós dekretu refere laiha ulun ain hodi bosok povu.

Tanba pagamentu subsídiu uma-kain USD 100 no implementasaun programa sesta bázika rasik seidauk kompleta, inklui funsionáriu hotu iha nanis saláriu ne’ebé bele sustenta nia moris.

Deputada opozisaun ne’e konsidera, dekretu Governu númeru 63/2020 ne’e, hanesan maneira ida,  atu hasa’e taxa ezekusaun orsamentu tinan 2020 nian, ne’ebé benefisia de’it ema balun, no implika ba fundu petrolíferu atu hotu ho lalais.

“Ba ha’u nia simples, modestu portugés, ha’u intende katak dekretu lei ne’e laiha ain no laiha ulun, ita bosok ema, tanba tuir ami-nia intendementu katak, sei selu vensimentu nakonu fulan ida nian ba kada funsionáriu ida, ita-nia osan fundu mina-rai sei hotu lalais liu, no iha OJE mós la prevé orsamentu hanesan ne’e. Konkluzaun ida hanesan ha’u hateten ona dala barak katak, OJE 2020 kala la ezekuta hotu, ne’e mak inventa asuntu sira hanesan ne’e, más depois de konfirma dala ida tan ho Governu, sira hateten katak, saláriu 13 hanesan nafatin ho uluk, ho izensaun ba sira ne’ebé kontratadu, ho asesor sira ne’ebé saláriu menus hosi USD 5000, maibé ba ha’u dekretu lei ne’e laiha esensia ka materia hanesan sira interpreta”,tenik deputada opozisaun ne’e ba jornalista iha Novu Turizmu, bainhira partisipa iha konferénsia nasionál partidu CNRT, Kuarta (23/12/2020).

Reprezentante povu ne’e husu parte kompetente sira, hanesan PJR, KAK no Kâmara Konta, atu buka tuir no akompaña prosesu ezekusaun no implementasaun dekretu nú 63/2020 ne’e, tanba tuir deputada ne’e hamosu desigulaidade.

“La viola lei, maibé viola mak dotasaun tudo governo iha OJE 2020, sira agora ba selu hanesan ne’e, agora saláriu 13 hanesan baibain selu iha dotasaun todo governo, maibé saláriu baze, la’os saláriu nakonu hanesan iha artigu 4 ho 5 nian ne’e se la sala. Dekretu lei ne’e tuir hau la nessesáriu, se sira hakarak halo, halo de’it mak ba asesores ho pessoal kontratadu ne’ebé la prevê iha dekretu anterior, Maibé governu tenke buka osan, tanba dotasaun ba ida ne’e laiha.

Lahatene osan foti hosi ne’ebé, maibé sira sei presta kontas, relatóriu ezekusaun kuartu trimester nian PN sei haree, no kâmara de kontas mós sei haree, se iha regularidades, iha instituisaun de kontrolu la’os PN de’it, iha kâmara de kontas, iha Prokuradór da Repúblika, KAK mós tau matan ba ida ne’e, Ne’ebé hanoin laiha problema uza de’it, tanba sira (Fretilin, PLP ho KHUNTO) mak ukun, sira mak deside. Maibé píor liu-tan iha dekretu ne’e hateten dehan, se orsamentu ne’e lato’o bele adía ba tinan oin mak foin selu uza osan 2021 nian. Ha’u-nia pergunta mak iha rubrika ruma iha ne’ebá mak tau para atu selu adisionais orsamentu 2020 nian, hanoin ne’e la loos, tanba se OJE ba 2021, por programas, ida ne’e tenke tama iha programa, maibé programa se nian? Maibé iha de’it dotasaun ida tudo governu ne’ebé fó posibilidade ba governu para atu bele halo nia polítika ida mak fó gaji 13 ne’e, tuir lei la’e, tanba laiha rúbrikas propriu ida ba ida ne’e, tanba saláriu adisional iha promosaun ou iha asuntu seluk,mas nunka bele ba désimu terseiru mes. Maibé se hadi’a tiha ona saláriu e vensimentu, posivelmente ba tinan oin, ezemplu, ita la presiza ona désimu terseiru més, tanba saláriu natoon ba sira”,tenik deputada ne’e.

Antes ne’e, sosiedade sivíl mos konsidera dekretu lei refere viola konstituisaun RDTL artigu 145, no konsidera mós dekretu lei ne’e, hanesan prátika abuzu ba poder priviléjiu, hodi hamosu diskriminasaun ba povu.

Dekretu Governu númeru 63/2020 ne’e promulga hos xefe Estadu Francisco Guterres Lú Olo,  iha loron 10, fulan Dezembru, tinan 2020 ne’e, ho montante osan tokon USD 25, hodi halo pagamentu estraordinária,  saláriu adisíonal ka dupla fulan ida nian, ba funsionáriu administrasaun públiku.Say

Leave a Reply

Your email address will not be published. Required fields are marked *