Ekipamentu limitadu difikulta servisu IJE

Ministru Obras Públika (MOP), Salvador Soares dos Reis Pires, hateten, Institutu Jestaun no Ekipamentu (IJE) labele normaliza mota hotu iha Timor-Leste ne’ebé hetan impaktu husi udan boot, tanba kondisaun ekipamentu ne’ebé limitadu.

“Ho ita nia ekipamentu ne’ebé limitadu, ita nia ekipamentu IJE depois de sira nia intervensaun iha 2018 no 2019 barak mak hetan estragus, preparasaun ne’e ita halo kedas iha tinan kotuk orienta IJE hodi normaliza mota sira, liu-liu prioritiza liu área sira ne’ebé ho konsentrasaun populasaun númeru boot hanesan Becusse nian no seluk tan”, MOP ne’e hafoin partisipa enkontru Konsellu Ministru (KM) iha Palásiu Governu, Kuarta (13-01-2021).

Governante ne’e deklara, pedidu ba normalizasaun mota ne’e mai husi fatin barak no IJE kontinua mobiliza nia rekursu sira, maibé depende ba nia gravidade to’o nivel oinsa no hodi halo atuasaun la-lais.

Nia esplika, liu husi Orsamentu Jerál Estadu (OJE) 2021 nian, Ministeriu Obras Públika mós propoin ona osan kuaze USD tokon 2, hodi bele halo reparasaun ba ekipamentu sira ne’ebé avaria.

Antes ne’e, Prezidente IJE, Ermenegilda da Costa Laurentina mós informa, totál ekipamentu ou mákina ne’ebé avaria hela hamutuk 30 resin. ida