Governu husu renova EE ba dala 10

Governu liu husi Konsellu Ministru (KM), Kuarta (20/01) propoin ba Prezidente Repúblika (PR), Francisco Guterres “Lú Olo” atu renova tan Estadu Emerjénsia (EE) ba dala 10, ne’ebé sei aplika iha Fevereiru to’o Marsu, tinan 2021.

“Governu husu ba PR atu estende tan EE no ida ne’e mak opsaun di’ak liu ne’ebé agora Estadu tenke foti ba ema hotu”, Ministru Prezidénsia Konsellu Ministru (MPKM), Fidelis Manuel Leite Magalhães ba jornalista sira iha Palásiu Governu, Kuarta (20-01-2021).

Governu foti dezisaun ne’e, tanba haree ba mudansa preokupante husi situasaun epidemiolójika no proliferasaun ba kazu rejistadu sira husi kontájiu COVID-19 iha nivel rejionál no mós iha nivel mundiál atu evita no neutraliza risku sira husi propagasaun SARS-CoV-2.

Nune’e bele proteje saúde públika no iha kbi’it atu hatán ba sistema nasionál saúde, Governu propoin ba PR katak, ho renovasaun EE permite atu suspende ka limita direitu kona-bá sirkulasaun internasionál, husi sirkulasaun no fiksasaun rezidénsia no rezisténsia nian.

Antes ne’e, iha loron 30, fulan Dezembru, tinan 2020 liu ba PR, Francisco Guterres “Lú Olo” liu husi dekretu prezidensiál númeru 73/2020, dekreta ona estensaun EE ba da-sia.

Dekretu prezidensiál ne’e vigora husi tuku 00.00 oras Timor-Leste, iha loron 3, Fulan Janeiru to’o tuku 23:59 oras Timor-Leste, iha loron 1, fulan Fevereiru, tinan 2021. ida