Importasaun ai-han menus, Governu seidauk deside loke fronteira

Ministru Prezidénsia Konsellu Ministru (MPKM), Fidelis Manuel Leite Magalhães, hateten, Governu seidauk iha desizaun atu loke fronteira, hodi halo importasaun ba ai-han, tanba tenke prevene risku ba transmisaun COVID-19.

Fidelis esplika, maske Governu esforsu hodi implementa planu rekuperasaun ekonomia, maibé risku husi COVID-19 ne’ebé mosu sei fó ameasa maka’as liu ba komunidade nia vida.

“Ha’u la ko’alia kona-bá atu loke loron ida ka rua, agora entre mate moris no ita tenke halo balansu entre saúde públika no ekonomia, ne’e la’ós buat ne’ebé bele hatán ho simples, wainhria bele loke hodi kontribui ba ai-han mak Governu sei halo, maibé agora ne’e risku iha loos ona odamatan”, MPKM ne’e ba jornalista sira hafoin remata reuniaun Konsellu Ministru (KM), iha Palásiu Governu, Sesta (29-01-2021).

Nia informa, iha situasaun difísil hanesan ne’e Governu tenke jere bazeia ba informasaun sira, hodi hola desizaun ne’ebé di’ak, atu labele lori komunidade ba risku.

Nune’e, atu garante ai-han durante pandemia COVID-19, Governu rasik iha asesu informasaun ho ajénsia sira no liña ministeriál sira, hodi buka solusaun, tanba problema hanesan ne’e la’ós akontese de’it iha Timor-Leste, maibé nasaun hotu.

Iha reuniaun KM ne’e, aprova mós sub-proposta husi Ministru Koordenadór Asuntu Ekonómiku no Ministru Finansa, kona-bá konjuntu orientasaun polítika relasiona ho ezekusaun programa sesta bázika, hodi rezolve kontratu pendente. ida