PN ezije Governu kombate pesti Tentara

Xefe bankada CNRT, Duarte Nunes, ezije ba Governu atu buka maneira ho sériu no la-lais, nune’e bele salva komunidade nia produtu hosi pesti Tentara, atu nune’e Timor-Leste labele hasoru difikuldade ba ai-han, iha ámbitu COVID-19 invade mundu tomak.

“Estadu iha para haree situasaun sira ne’e, povu nia susar iha ne’ebé no povu nia toos akontese buat ruma, Estadu iha obrigasaun atu buka kombate ida ne’e ho aimoruk ida modernu ne’e, iha nasaun seluk mós bele uza ida ne’e. Sé uza tradisional bainhira mak ita atu uza no atu iha produsaun para atu fa’an to’o liur, agrikultura mak tenke iha mekanizmu uza mákina sira hodi hala’o servisu, ne’e mak ita dehan buka para atu sustentabilidade no auto-sufisiensia ba ita nia hahan”, afirma Duarte Nunes ba Jornalista sira iha Parlamentu Nasional (PN), Kinta (21/01/2021).

Alénde ne’e, deputadu Adriano do Nascimento, konsidera, pesti ne’ebé ataka populasaun nia ai-han iha toos, hanesan dezastre natural ne’ebé la espera, tanba ne’e husu sidadaun hotu atu kolabora hodi buka maneira oi-oin, uza tradisional ou ai-moruk nune’e  bele salva.

“Buat ne’e ita la halo predisaun ida ba buat natureza ne’e, sé mai hanesan ne’e, vírus mai, ida ne’e mós mai, saida mak ita iha ita prevene, sé labele pasiensia, tanba hotu-hotu hasoru problema, ita atu ba sosa aimoruk iha Jakarta mós labele, apalagi Atambua”, subliña deputadu PD ne’e.

Kazu pesti Tentara ataka populasaun nia batar akontese ona iha Covalima, Baucau, Maubisse no fatin seluk tan.

Antes ne’e, Ministru Agrikultura no Peska, Pedro dos Reis, prefere uza aimoruk tradisional hodi prevene pesti Tentara ataka ai-han iha toos laran. say