PN: Governu tenke buka solusaun ba estudante Timor-oan iha Atambua

Reprezentante povu iha uma fukun Parlamentu Nasionál (PN) husu ba Governu buka solusaun ba estudante Timor-oan ne’ebé hela iha konsuladu iha Atambua-Indonézia.

“Ha’u rona informasaun hosi média tempu badak Governu atu loke fronteira hodi simu sira, ha’u la hatene ho situasaun agora ita hotu preokupa, ita-nia viziñu Atambua númeru COVID sa’e maka’as to’o ema mate, será que ita lakohi husik ita-nia oan sira iha ne’ebá ho tempu naruk sein iha kespastian ida bainhira mak sira bele tama, maibé atendimentu ba sira tenke maka’as no rigor, labele transmite moras lori tama mai iha ne’e, nune’e labele kahur ema sira ne’ebá”, Deputada CNRT, Virginia Ana Belo hato’o kestaun ne’e liu hosi ninia intervensaun  iha plenária, Segunda (18-01-2021).

Nune’e, Xefe bankada PUDD, António de Sa Benevides mós husu ba Governu presiza buka solusaun ba estudante Timor-oan hela iha konsuladu Atambua, nune’e bele hatama sira liu hosi dalan legál.

“Ha’u hanoin señor ministru ita presiza rezolve asuntu ne’e ba ita-nia estudante sira buka dalan oinsa bele hatama sira tuir dalan legal, sé la’e husik hela sira bele liu hosi dalan sira ne’ebé ita lakohi i bele afeta ba ita moras COVID-19, ita bele la kontrola bainhira ita la rezolve ho diak”, dehan Xefe bankada PUDD ne’e.

Ministru Asuntu Parlamentár no Komunikasaun Sosiál (MAPKOMS), Francisco Jeronimo, klarifika, Governu sei halo koordenasaun ajénsia konsuladu iha Atambua no Kupang-Indonézia iha tempu badak sei lori fila.

“Neste momentu sira iha Atambua, sira barak hela iha ajénsia konsuladu Atambua mak fó hela protesaun no tau matan ba sira hein hela bainhira mak loke fronteira lori sira mai Timor nia problema ba ita mak sira mai mós ita labele tau hamutuk sira iha ne’e, ita haree loos tiha hotu sira sai ona iha ne’ebá tama fali mai hela fali fatin ne’ebé Governu prepara”, tenik Governante ne’e.

Entretantu iha loron 20, fulan ne’e, Governu deside loke hikas fronteira atu lori fila estudante Timor-oan 56 ne’ebé dau-dauk ne’e hela iha konsuladu Atambua-Indonézia, tanba amesadu mós ba funsionáriu konsuladu no komunidade lokál.

Antes ne’e mós, Vise Ministru Interior (MI), António Armindo, hateten, Governu prontu fasilita estudante sira ne’e no lori fila mai Timor-Leste, maibé tenke kumpre regra protokolu saúde nian, nune’e labele lori risku ba ema seluk. ety