PN: PNTL tiru tohar sidadaun tama-sai ilegál

Parlamentu Nasionál (PN) husu Polísia Nasionál Timor-Leste (PNTL) atu tiru tohar sidadaun ne’ebé mak tama-sai ilegalmente, liu hosi liña fronteira terreste.

Xefe Bankada Kmanek Haburas Unidade Nasional Timor Oan (KHUNTO), Deputada Olinda Guterres, fó razaun hirak ne’e, tanba dau-daun ne’e pandemia COVID-19 iha Atambua-Indonézia ninia númeru husi loron ba loron aumenta.

“Sé mak kontra hodi nafatin tama no sai ba  Atambua liu hosi dalan ilegál mak husu ba seguransa ne’ebé iha fronteira labele tolera kaer kona fó sansaun ne’ebé rigorozu ba ema ne’ebé tama-sai, labele tiru mate de’it tiru tohar nia ain, para hodi komprende”, Xefe Bankada KHUNTO ne’e iha uma fukun PN liu hosi plenária extraordinária, Kinta (28/01/2021).

Iha okaziaun ne’e, Deputada Olinda husu ba autoridade lokál no seguransa atu kontrola ho másimu iha fronteira, nune’e sidadaun sira labele tama-sai arbiru, hodi bele prevene COVID-19 labele da’et  hosi ema ida ba ema seluk.

“Husu ba Ministériu Saúde atu kontrola pasajeiru ne’ebé mai husi estránjeiru, sira labele kahur pasajeiru husi nasaun ne’ebé la hanesan iha kuarentena ida atu, nune’e ida hetan sintoma karik labele impede fali sel-seluk”, dehan Xefe Bankada KHUNTO ne’e.

Tuir dadus husi MS hahú husi loron 27, fulan Janeiru, tinan 2021 ne’e, totál kazu kumulativu 68, kazu foun 1 no atuál baixa 18. avi