PN seidauk resposta notifikasaun husi TR kona-bá OJE 2021

Parlamentu Nasionál (PN) seidauk fó resposta ba karta notifikasaun husi Tribunál Rekursu (TR) atu halo fiskalizasaun abstrata kona-bá inkonstitusionalidade lei Orsamentu Jerál Estadu (OJE) tinan 2021.

TR haruka karta notifikasaun ba PN ne’e, relasiona ho bankada CNRT nia pedidu ba TR atu halo fiskalizasaun abstrata ba inkonstituisionalidade OJE 2021, iha loron 6, fulan Janeiru ne’e.

Nune’e, iha loron 12, fulan ne’e, TR haruka karta notifikasaun ba Prezidente PN, Aniceto Guterres, maibé seidauk fó resposta, tanba sei iha hela faze elaborasaun.

“Hanesan ha’u fó hatene ita boot sira iha semana rua ba kotuk Prezidente PN reprezenta órgaun soberania PN simu ona notifikasaun, hodi TR relasiona ezijénsia pedidu hosi bankada CNRT nian iha ne’ebá ha’u hateten, iha loron 30, dentru loron 30 PN tenke resposta ba notifikasaun hodi TR ne’ebé fó ba PN. Maibé agora sei iha faze elaborasaun resposta PN tenke presta, submete ba TR, sei la’o nafatin hela nia faze konkluzaun seidauk iha, maibé PN buka atu kumpre nafatin prazu loron 30 ne’e”, Sekretaria meza PN, Lídia Norberta liu hosi konferénsia imprensa iha PN, Sesta (29-01-2021).

OJE 2021 ho montante USD billiaun 1.8 resin aprovadu iha PN, iha loron 12, fulan Dezembru no Prezidente Repúblika promulga iha loron 28, fulan  Dezembru, tinan 2020. Maibé iha loron 12, fulan Janeiru, tinan 2021, TR notifika kedas Prezidente PN, Aniceto Guterres. ety