PR husu PD kontinua apoia polítika di’ak ba TL

Sekretáriu Jeral Partidu Demokratiku (PD), Antonio da Conçeição “Kalohan” deklara, iha sorumutu ho Prezidente Repúblika (PR), Francisco Guterres Lú Olo ne’e hodi hato’o Boas festas do Santo Natal no tinan foun ba PR, nune’e Lú Olo husik mensajen ba PD atu kontinua apoia polítika di’ak ba Timor-Leste (TL).

Kalohan mos dehan, sorumutu ne’e mos atu fó  apresiasaun tanba Xefe Estadu promulga ona Orsamentu Jeral Estadu (OJE) 2021 nian.

 “Agora ita sei iha hela períodu Natal ho tinan foun ninian, Partidu Demokratiku antes Natal haruka karta husu atu iha audiénsia ho Prezidente Repúblika atu hato’o kumprimentu Boas Festas do Santo Natal nian, maibe iha biban ne’eba laiha oportunidade ba hasoru foin mak husi Palásiu Prezidensial ninian telefone atu ami hasoru malu ho Prezidente, hodi hato’o ami na felisitasoens Natal no tinan foun, tanba hanesan  bankada ida iha Parlamentu fo  apresiasaun ba aktu polítiku Xefe Estadu nian hodi promulga Orsamentu Jeral Estadu (OJE) 2021 nian”,dehan Kalohan  ba Jornalista sira Tersa (05/01/2021), iha Palásiu Prezidensial Nicolau Lobato, Bairo Pité, Díli.

Kalohan afirma, hanesan Prezidente Repúblika, sei iha esperansa hodi halo dezenvolvimentu, ekonomia liu husi OJE.

“Prezidente Repúblika nafatin sura ho Partidu Demokratiku ninia atuasoens polítika iha Parlamentu atu bele nafatin dignifika povu nia terus, lori dezenvolvimentu ba ita-nia rai,  Prezidente Repúblika husu PD kontinua ho pozisaun polítika fo apoiu ba inisiativa ne’ebé diak ba rai ida ne’e nian, Prezidente hakarak  ida ne’e mak mai atu, no ami kompromete  katak ba Nasaun ami fo ona buat ne’ebé mak ami tenki fo ba povu, PD manifesta ida ne’e, iha ninia votu sira ne’ebé mak fo iha OJE 2020 ho 2021 nian”,realsa Kalohan.

Alende ne’e, Deputadu bankada PD iha Parlamentu Nasional (PN) ne’e akresenta, kona-ba PD atu hola  parte iha remodelasaun, sira la iha kbiit atu koalia kona-ba asuntu refere, tanba  la’ós kestaun Partidu Demokratiku nian, maibe kestaun Governu no Estadu nian, karik oportunidade remodelasaun iha, maibe seidauk iha informasaun formal ne’ebé koalia iha partidu ida ne’e.

“Ami fó ona mai nia votu ba OJE ne’ebé hanesan raan ba nasaun nian ami fó no afirma tiha ona,  ami afirma tiha ona ami-nia pozisaun ba saida mak diak ba rai ida ne’e, ita boot sira la bele antesipasaun remodelasaun, tanba ne’e  kompetensia Primeriu Ministru nian”,tenik Kalohan. Oly