CNRT: Governu lockdown munisípiu rua la suspende prosesu aprendizajen

Reprezentante povu iha uma fukun Parlamentu Nasionál (PN), liu-liu bankada CNRT preokupa ho Governu aprova Projetu Rezolusaun bandu ema tama-sai iha munisipíu Bobonaro no Covalima, maibé Governu seidauk foti desizaun hodi suspende prosesu aprendizajen.

Deputada bankada opozisaun, Virgínia Ana Belo, hateten, dau-daun ne’e dekretu Prezidente Repúblika (PR) aplika Estadu Emerjénsia (EE), iha teritóriu nasionál, maibé Projetu Rezolusaun Governu aplika lockdown ba munisípiu rua, inklui RAEOA.

“Agora situasaun eskola sira iha ne’ebá tenke rezolve, ita labele husik hela kondisaun ida ne’e nakloke hanesan ne’e. Ne’e labele, tenke iha duni desizaun ida ba situasaun agora dau-dauk iha munisípiu rua ne’e“, Deputada bankada CNRT ne’e iha plenária, Tersa (16-02-2021).

Ministru Edukasaun Juventude no Desportu (MEJD), Armindo Maia,  klarifika, Governu seidauk foti desizaun atu halo suspensaun ba prosesu aprendizajen iha eskola sira, tanba presiza halo diskusaun iha Konsellu Ministru (KM).

“em prinsípiu ami la suspende, foin la-lais kazu iha Eskola Bázika Bemori nian, tanba sei iha suspeitu katak, akontese transmisaun, entaun ami suspende durante loron rua ka tolu depois hatene rezultadu prontu sira saída fila-fali, nune’e mós foin dau-dauk ami simu telefone hosi Hauba eskola sira iha ne’ebá dehan profesór ida sa’e Angguna, entaun temporariamente eskola. Karik afetadu bele lai suspende loron rua ka tolu, depois ida ne’e mak hanesan ami pontualmente suspensaun jeralmente ami la saída“, tenik Governante ne’e.

Entretantu KM estraordináriu iha loron 15, fulan ne’e, aprova Projetu Rezolusaun Governu ida hodi impoin serka sanitaria iha munisípiu Bobonaro, Covalima no mós Rejiaun Administrativa Espesiál Oe-Cusse Ambeno (RAEOA).

Objetivu husi Governu inpoin serka sanitária ne’e atu a cautela saúde públika populasaun no impede okorénsia transmisaun komunitária husi Coronavírus foun iha teritóriu nasionál.

Ho projetu rezolusaun Governu ida ne’e hanesan bandu dezlokasaun sira entre munisípiu sira ne’e no munisípiu sira seluk. Rezolusaun Governu ida ne’e prodúz efeitu sira iha loron tuir mai ba ninia publikasaun no termina iha tuku 23:59, iha loron 3, fulan Marsu, tinan 2021. ety