FP seidauk simu saláriu, PM husu kada ministériu rezolve

Primeiru Ministru (PM), Taur Matan Ruak, deklara, nia parte hatún ona orden ba Ministériu Finansa no mós ministériu sira seluk atu rezolve tiha Funsionáriu Públiku (FP) sira ne’ebé seidauk simu sira-nia saláriu.

“Horiseik (Horibainrua) Konsellu Ministru ko’alia ida ne’e, iha ministériu balun ninia prosesu ne’e atraza, apela ba ministériu sira ne’e no mós Finansas para bele rezolve problema ida ne’e, tanba ha’u lakohi funsionáriu sira lakon no atraza sira-nia saláriu”, PM, Taur ba jornalista sira, Kinta (04/02/2021), iha Palásiu Prezidensiál Nicolau Lobato, Bairro Píte, Díli.

Governante ne’e salienta, dau-daun ne’e nia parte hein katak Ministériu Finansa parseria ho ministériu sira ne’ebé nia funsionáriu afetadu sira bele servisu maka’as.

“Normalmente kada fulan ministériu tenke konfirma nia rekursu umanu, ida ne’ebé mak sei moris no ida ne’ebé mak mate ona, prosesu tenke ba, kuandu prosesu la ba saláriu bele atrazu, tanba Ministériu Finansa labele selu atribui, dalaruma selu fali funsionáriu mate klamar ruma karik”, subliña PM, Taur. oly