Governu reativa sala situasaun SIJK

Governu liu husi despaixu Primeiru Ministru (PM), Taur Matan Ruak, deside reativa hikas sala situasaun Sentru Integradu Jestaun Krize (SIJK), hodi reforsa servisu Ministériu Saúde (MS) ba prevensaun COVID-19 iha Timor-Leste.

“Sei iha publikasaun ba iha tempu badak ba despaixu husi PM kona-bá reativasaun SIJK nu’udar sala situasaun, ba ho ida ne’e bazeia ba lei Seguransa Nasionál no artigu 6 husi dekretu lei númeru 24/2020, loke dalan bele iha reativasaun ba funsionamentu SIJK nu’udar sala situasaun. Sala situasuan ida ne’e sei sede iha Díli, maibé ho kriasaun unidade teritoriál, sei fahe ba iha unidade tolu. Unidade teritoriál RAEOA sentru operasaun sei iha Pante Makassar, Unidade teritoriál Bobonaro sentru operasaun iha Maliana no Unidade teritoriál Covalima sei ho sentru operasaun iha Suai. Hafoin publikasaun prevé ona despaixu sei tama iha Vigor hahú loron 2 fulan Fevereiru”, Ministru Prezidénsia Konsellu Ministru (MPKM), Fidelis Magalhães liu husi konferénsia imprensa iha Palaçio do Governo, Tersa (2/2/2021).

Tuir nia, despaixu reativasaun ba SIJK husi PM, Taur Matan Ruak ne’e sei tama iha vigór iha loron 2, fulan Fevereiru ne’e.

Antes ne’e, Diretór SIJK, Brigadeiru Jenerál João Miranda “Aluc Descartes”, hateten, SIJK reativa ona ho nia estrutura no rekursu humanu ne’ebé reduzidu. No servisu iha sala situasaun ba periódu daruak sei foku liu iha liña fronteira sira.

SIJK hari’i iha loron 28, fulan Marsu, tinan 2020, iha momentu ne’ebá Governu aplika hela Estadu Emerjénsia (EE) dahuluk ba kazu COVID-19, maibé iha loron 30, fulan Juñu, tinan 2020, Xefe Governu ofisialmente ensera servisu sala situasaun SIJK no entrega hikas koordenasaun servisu ba MS, hodi kontinua hala’o prevensaun no metigasaun ba surtu COVID-19. oct