Heineken hapara traballadór Timor-oan, uza fali estranjeiru

Reprezentante povu iha uma fukun Parlamentu Nasionál (PN) lamenta ho kompañia internasionál Heineken, tanba hapara traballadór Timor-oan na’in 10 resin, maibé hatama fali sidadaun estranjeiru.

Deputadu bankada FRETILIN, Dário Madeira, hateten, sidadaun estranjeriu sira ne’ebé servisu iha kompañia Heineken ne’e ho saláriu ne’ebé boot no ho númeru saláriu refere bele selu ba Timor-oan na’in 10 resin ne’ebé kompañia hasai.

Tuir nia, servisu ne’ebé sidadaun estranjeiru sira halo ne’e Timor-oan mós bele halo, maibé kompañia deside hapara traballadór Timor-oan kuaze na’in 10 resin, ho nune’e husu ba Governu no Estadu presiza tau atensaun ba kestaun ne’e.

“Investimentu boot ida mai para lori ema estranjeiru servisu iha ne’e, Timor-oan atu servisu fali iha ne’ebé, ka ida ne’e hanesan planu Governu iha ona, haruka Timor-oan sira ba Austrália no Korea, estranjeiru atu domina fali. Ha’u hanoin polítiku ida Governu nia intervensaun importante, presiza haree ida ne’e”, Deputadu bankada FRETILIN liu hosi nia intervensaun iha plenária, foin la-lais ne’e.

Nune’e mós, deputadu bankada KHUNTO, Luis Roberto, informa, razaun kompañia hapara traballadór Timor-oan ne’ebé servisu iha Heineken, ne’e tanba la hetan lukru.

“Reduz ita-nia traballadór Timor-oan, mantein traballadór internasionál Timor-oan rai-na’in hasa’i tiha, ida ne’e dalaruma kontra regra ita presiza tau matan no bele hadia, ha’u sei hato’o liu hosi eskrita ba Ministru bele haree“, tenik Luis.

Hatán ba kestaun ne’e, Ministru Asuntu Parlamentár no Komunikasaun Sosiál (MAPKOMS), Francisco Jeronimo, hateten, nia parte sei haruka karta ba ministériu kompetente atu buka solusaun.

To’o notísia ne’e públika, GMN seidauk hetan konfirmasaun hosi kompañia Heineken. ety