PN lamenta membru PNTL baku komunidade to’o nehan monu

Reprezentante povu iha uma fukun Parlamentu Nasionál (PN) lamenta ho aktu membru Polísia Nasionál Timor-Leste (PNTL) balun, ne’ebé halo  agresaun fíziku ba komunidade ida iha área Comoro to’o nehan monu.

Kazu ne’e akonteze iha Sesta, loron 5, fulan ne’e, mais ou menus tuku 06:00 lorokraik oras Timor-Leste, bainhira membru PNTL, unidade Task Force Díli halo atuasaun bazar iha Comoro área rotunda Nicolau Lobato.

“Ita-nia profesór ida atu sosa modo iha fatin ida ne’e duni, polísia ida to’o ba duni ema nia tauk la konsege, entaun bainhira sidadaun atu kompra modo nia lori nia motor atu fila ba uma, polísia la husu buat ida, maibé baku nia nehan rua monu sai hotu”, Deputadu bankada FRETILIN, Dário Madeira liu hosi ninia intervensaun iha plenária, Segunda (08-02-2021).

Nia sujere ba membru polísia sira, atu halo aproximasaun ba komunidade hodi sai amigu, la’ós sai fali inimigu.

Ho nune’e, deputadu bankada FRETILIN ne’e husu ba ministériu kompetente atu halo investigasaun ba membru PNTL ne’e, tanba ne’e prosesu tenke la’o, atu nune’e polísia labele sai inimigu ba komunidade, maibé sai parseiru.

Nia konsidera mós katak, Guarda Munisipál Díli no PNTL falla atu rezolve problema bazar iha merkadu Comoro, tanba ne’e tenke trasa planu seluk, para rezolve, tanba foti hela de’it negosiante sira-nia sasán ne’e la rezolve problema.

Entretantu Ministru Asuntu Parlamentár no Komunikasaun Sosiál, Francisco Jeronimo, hateten, nia parte sei alista preokupasaun ne’e, hodi hato’o ba ministériu kompetente atu toma atensaun. ety

Leave a Reply

Your email address will not be published. Required fields are marked *