JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

CNRT: Sistema judisiáriu TL moras todan tanba PJR la imparsiál

CNRT: Sistema judisiáriu TL moras todan tanba PJR la imparsiál

Deputadu CNRT, Gabriel Soares, liuhosi deklarasaun polítika bankada nian konsidera, sistema judisiáriu iha Timor-Leste, dadaun ne’e hanesan ema moras todan, tanba la garante imparsialidade, liu-liu Prokurador Jeral Repúblika, José Ximenes la hatudu ninia imparsialidade perante públiku.

Maske nune’e, deputadu opozisaun ne’e afirma, deputadu 21 hosi bankada CNRT prontu ba hatan iha Tribunal, bainhira prosesu hotu tuir dala legal.

“Ohin Bankada CNRT hakarak manifesta ninia pozisaun polítika ba públiku relasiona ho ita nia sistema judisiária ne’ebé oras ne’e iha hela moras todan nia laran. Bankada CNRT hare’e no tetu katak, deklarasaun Prokuradór-Jerál da Repúblika José da Costa Ximenes iha loron 23 fulan-Marsu tinan 2021 hafoin hasoru malu ho Prezidente-Repúblika ne’ebé la-reflete ninia koñesimentu hanesan majistradu ida, no sistematikamente hafraku tiha Sistema justisa iha Timor-Leste. Relasaun ho kestaun ida ne’e, Bankada CNRT hakarak responde deklarasaun Señor Prokuradór-Jerál da Repúblika José da Costa Ximenes mak hanesan tuir mai ne’e. Bankada CNRT lamenta ho deklarasaun Prokuradór-Jerál da Repúblika José da Costa Ximenes ne’ebé konsidera katak, “notifikasaun ba deputadu sira CNRT nian bele fó iha merkadu ka iha Bankada”. Deklarasaun ida ne’e minimiza no insulta Parlamentu Nasionál hanesan órgaun soberanu estadu RDTL nian. Tanba deputadu sira halo deklarasaun polítika ho estatutu hanesan Membru Parlamentu núdar asaun polítika”dehan deputadu bankada CNRT, Gabriel Soares.

“Bankada CNRT mós lamenta ho Prokuradór-Jerál nia deklarasaun ne’ebé la respeitu separasaun poderes tuir Konstituisaun haruka. Prokuradór-Jerál nia protesta hasoru desizaun Tribunal nian ne’e hatudu momoos katak Prokuradór-Jerál minimiza no dezvaloriza Tribunal nia kompeténsia nu’udár órgaun estadu ne’ebé nia desizaun maka ás liu hotu. Sé Prokuradór-Jerál maka kestiona ona desizaun Tribunal nian, oinsá estadu bele obriga povu ki’ik sira atu kumpre desizaun Tribunal nian?

Deputadu sira husi Bankada CNRT prontu atu hatán ba Tribunal, maibé Bankada CNRT mantein prinsípiu katak defende Konstituisaun no Lei sira, no halo tuir de’it mak prinsípiu no valores Estadu de Direitu Demokrátiku. Tanba-ne’e maka Bankada CNRT kontra prosesu sira hotu ne’ebé la tuir dalan legál, no ohin Bankada CNRT manifesta ninia lamentasaun no preokupasaun ba deklarasaun emosionál no frustrasaun husi Prokuradór-Jerál da Repúblika José da Costa Ximenes, iha loron 23 fulan-Marsu tinan 2021, ne’ebe halai sees husi korredór jurídiku nian.

Lee hotu :   PUDD husu polítiku sira hamutuk rezolve povu nia halerik

Bankada CNRT haree momoos katak, deklarasaun Prokuradór-Jerál da Repúblika hatudu katak, Prokuradór Jerál rasik lá komprende Timor-Leste nia Kódigu Prosesu Penal, artigu 92 númeru 1 ne’ebé deskreve katak, notifikasaun ba suspeitu tenke entrega diretamente ba pesoál referidu; no artigu 93 alínea (c) ne’ebé deskreve katak, suspeitu tenke asina notifikasaun ne’ebé dirije ba suspeitu refere. Tanba funsionáriu husi Ministériu Públiku la-entrega notifikasaun em pesoál ba deputadu husi Bankada CNRT ne’ebé konsidera hanesan suspeitu. Ilegalidade ida ne’e maka sai baze fundamentál ba Bankada CNRT hodi husu nulidade de notifikasaun ba deputadu sira husi Bankada CNRT.

Bankada CNRT lamenta ho deklarasaun husi Prokuradór-Jerál José da Costa Ximenes iha mídia nasionál ne’ebé nakonu ho nosaun polítika no interese pesoál relasiona ba kazu ne’ebé dirije ba Sekretáriu-Jerál Partidu CNRT Kompañeiru Francisco Kalbuadi Lay. Sekretáriu-Jerál CNRT la hasees-án husi prosesu judisiál tanba durante ne’e kolabora no iha komunikasaun regulár ho Prokuradór Repúblika Titular ba prosesu Kompañeiru Francisco Kalbuadi Lay nia kazu.

Prokuradór-Jerál Repúblika, José da Costa Ximenes halo pedidu ba Tribunal Distrital de Díli (TDD) atu hasai mandadu Kapturasaun internasionál ba Sekretáriu-Jerál CNRT Companheiro Francisco Kalbuadi Lay, maibé TDD rejeita pedidu Ministériu Públiku ida ne’e. Nune’e mós bain-hira Prokuradór-Jerál hato’o rekursu ba Tribunal Rekursu kona-ba TDD nia desizaun maibé Tribunal Rekursu mós rejeita no mantein desizaun hanesan ho TDD tanba razaun legalidade.

Bankada CNRT lamenta ho Prokuradór-Jerál ne’ebé la simu ka dezakredita fali desizaun Tribunal Rekursu núdar Tribunal ida ás liu iha Timor-Leste liuhosi nia intervista ho Jornalistas sira iha Pálasiu Prezidensiál.

Prokuradór-Jerál da Repúblika José da Costa Ximenes dala barak ona halo protesta, hatún Tribunal nia kredibilidade publikamente no hahalok Prokuradór-Jerál nian ida ne’e la eduka povu atu respeita Tribunal.

Lee hotu :   Maria Teresa: PD lakohi EA, mantein VII Governu

Prokuradór-Jerál da Repúblika José da Costa Ximenes hato’o lia bosok ba públiku bain-hira deklara ba mídia katak Ministériu Públiku la hatene paradeiru husi Sekretáriu-Jerál CNRT. Ami hatene durante ne’e Kompañeiru Francisco Kalbuadi Lay kolabora di’ak no informa ho transparente no regulár kona-ba ninia paradeiru no justifika ba Ministériu Públiku katak oras ne’e halo hela tratamentu saúde iha rai liur.

Bankada CNRT preokupa no lamenta tanba Prokuradór-Jerál nia deklarasaun ne’e hatudu indikasaun forte katak Prokuradór-Jerál José da Costa Ximenes rai ódiu no vingansa pesoál hasoru Sekretáriu-Jerál Partidu CNRT Kompañeiru Francisco Kalbuadi Lay, no hasoru Maun Bo’ot Kay Rala Xanana Gusmão nia partidu, CNRT. Situasaun sira ne’e hatudu iha tendénsia katak, Prokuradór-Jerál aproveita Ministériu Públiku hodi halo persegisaun polítika ba kuadru sira husi Partidu CNRT nian.

Bankada CNRT preokupa ho Prokurador-Jeral da Repúblika nia servisu ne’ebé la imparsiál tanba Prokuradór-Jerál la prosesa no iha tendénsia budu tiha kazu barak ne’ebé Câmara de Contas rasik deskobre iha irregularidade no ilegalidade, hanesan kazu ferry Haksolok ne’ebe halo tiha ona pagamentu 100% maibe ferry ne’e seidauk mai Timor-Leste, no akizisaun USB kada unidade ho folin $450 ne’ebé akontese iha RAEOA-ZEESM.

Bankada CNRT fiar katak Prokuradór-Jerál da Repúblika José da Costa Ximenes konxiente no hatene ho di’ak katak laiha prosesu ruma maka naksalak ho kazu Sekretáriu-Jerál CNRT Kompañeiru Francisco Kalbuadi Lay nian, maibé José da Costa Ximenes ho intensaun duni hakarak halo sensasaun ba kazu ida ne’e ba nia interese pesoál.

Atu remata, Bankada CNRT husu ba Prokuradór-Jerál da Repúblika iha Ministériu Públiku atu servisu ho imparsiál hodi defende interese estadu RDTL nian, no liu-liu atu implementa Lei ho justu no hanesan ba ema hotu. Bankada CNRT husu atu Ministériu Públiku labele sai fali knuuk ba atividade polítika, tanba sei fó ameasa ba justisa iha Timor-Leste no halo rahun liután prinsípiu Estadu de Direitu Demokrátiku iha Timor-Leste.”hateten deputadu Gabriel iha deklarasaun polítika bankada ne’e, Segunda (29/03/2021).

Lee hotu :   Xanana: Justisa agora haree ba Lei la’os ema nia fiar

Alénde ne’e, deputadu bankada apoiu governu, Luis Roberto hateten, prokuradór jerál hala’o servisu bazeia ba kompetensia, tanba ne’e, sidadaun hotu presiza kumpri.

“Deklarasaun hosi maluk sira bankada CNRT ne’e, tuir hau nia hanoin deklarasaun ida ne’e, bankada CNRT hamihis ona fi’ar ba ita nia PJR, hamihis ona fi’ar ba justisa. Tanba bazeia ba iha kódigu penál, iha ne’ebá hakerek momós katak, kompeténsia absolutamente ba prosesu kazu krime ninian. Bazeia ba notifikasaun, iha kódiku prosesu penal, iha ne’ebá kuandu notifika sidadaun ida, lahatene ninia paradeiru ne’ebé sertu, bele notifika liuhosi nia instituisaun ne’ebé servisu ba, ne’eduni hau hanoin ita nia PJR la kontra no la viola buat ida, tanba ne’e husu nafatin kumpri nafatin ba justisa ida ne’e, tanba ne’e kompeténsia PJR nian, ita labele kestiona ida ne’e.”dehan.

Maske nune’e, iha Segunda semana ne’e, prezidente partidu CNRT, Kay Rala Xanana Gusmão ba Ministériu Públiku, hodi sai sasin ba kazu ne’ebé keixa hosi Marí Alkatiri ba deputadu 21 hosi CNRT ho estrutura Konsellu Polítika Nasionál ka CPN- CNRT.

To’o notísia ne’e publika, GMN seidauk hetan konfirmasaun hosi PJR José Ximenes, tanba la disponivel.Say

Add to Comments Here!!!!

error: Content is protected.
Secured By miniOrange
You might also like:
Xanana Prontu aprezenta provas iha Tribunál kona-ba Alkatiri simu subornu

Prezidente Partidu CNRT, Kay Rala Xanana...

Aban estudante 72 iha Israel to’o TL

Governu kontrata ona aviaun Citilink, hodi...

Kazu konfirmadu Covid-19 foun 11, atuál baixa 322

Kordenador Forsa-Tarefa ba Prevensaun no Mitigasaun...

Close