Governu hapara serka sanitária iha Munisípiu Covalima, Fatumea kontinua taka

Governu loke ona serka sanitária ba Munisípiu Covalima atu nune’e komunidade bele hala’o atividade hanesan baibain, maibe postu administrative Fatumea kontinua taka to’o 21 marsu.

Ministru Prezidensia Konsellu Ministru, Fidelis Magalhães, hatete servisu Administrativu no eskola sira, iha, munisípiu Covalima sei kontinua taka to’o loron 13, Sabado mai, maibe postu administrativu Fatume maka taka too 21 Marsu..

“Hafoin aprezentasaun husi Primeiru Ministru ,Taur Matan Ruak, konaba situasaun epidemiolójika iha munisípiu Covalima,Konsellu Ministru delibera ona atu levanta impozisaun serka sanitáriu ida iha munisípiu ne’e exetu iha postu administrative Fatumea ne’ebé sei mantein to’o loron 21,fulan Marsu,servisu sira administrasaun públiku nian no eskola sira sei kontinua taka to’o loron 13,fulan Marsu”, hatete  Fidelis Magalhães, ba Jornalista sira, hafoin reniaun Konsellu Ministru, Kuarta (10/3).

Porta Voz ne’e esplika, reuniaun Konsellu Ministru ne’e, hahú halo avaliasaun ba situasaun epidemiolójika serka sanitáriu iha munisípiu Covalima, exetu iha Postu Administrativu Fatumea, ne’ebé sei mantein to’o loron 21 fulan Marsu, tuir determinasaun husi  Governu.

Fidelis Magalhães,hatete  serka sanitária iha munisipiu Covalima bele loke ona, nune’e Komunidade sira bele hala’o atividade hanesan bain-bain, no eskola sira mós bele hahú prosesu apendizajen, maibé iha Postu Administrativu Fatumea sei kontinua taka total ba servisu Administrativu no eskola sira.

Nune’e Governu husu nafatin ba povu Covalima, atu tuir nafatin regra sira ne’ebé implementa husi Ministériu Saúde no Organizasaun Saúde Mundial nian, hodi uza maskára, fase liman bebeik, no kontrola nafatin distansiamentu sosiál.

Fidelis Magalhães  dehan atu hakotu serka sanitária iha munisípiu Covalima, hodi Komunidade sira la’o livre, depende ba númeru pozitivu COVID-19 iha munisípiu refere.Tos