ORHF hamriik hodi hametin FRETILIN

Prezidente ba Organizasaun Rezistensia Hametin Fretilin (ORHF), Abilío Mausoko, ofisialmente deklara ezisténsia, hodi reforsa Fretilin atu hetan vítoria iha eleisaun Prezidensiál no Parlamentar períodu tuir mai.

Liuhosi konferénsia imprensa, Prezidente ba Organizasaun rezisténsia ne’e, husu membru sira, atu servisu maka’as liutan, nune’e bele hametin no reforsa Fretilin iha eleisaun jerál tuir mai.

“Liuhosi deklarasaun ida ne’e ORHF sei hakruk ba estatutu no manual Fretilin nian, respeitu órgaun másimu Fretilin nian, ka’er prinsípiu polítiku Fretilin ho espíritu revolusionáriu, nu’udar elementu esensiál iha luta ba libertasaun no independensia. Iha transformasaun mental, sosio ekonómiku, no espíritu ida ne’e mak sei kontinua relevante iha agora, hodi buka solusaun ba estadu ida ne’e, transformasaun ida ne’e, hodi hametin Estadu direitu demokrátiku.”tenik Abilío Mausoko iha salaun Luz Clarita, Sábadu (06/03/2021).

Alénde ne’e,  reprezenta Konsellu polítika Nasional, José Manuel ‘Nakfilak’, afirma, ezisténsia organizasaun ho moto hametin Fretilin ne’e, la’os tanba Fretilin namlele, maibe hakarak hametin liutan atu bele manan maioria absoluta iha eleisaun mai.

Nakfilak afirma, Fretilin iha materia ne’ebé barak liu tan, atu aprezenta ba eleitor sira iha kampaña ba eleisaun jerál tinan 2023.

Kona-bá envolvimentu Fretilin iha governasaun da-ualu ne’e, membru CPN Fretilin ne’e argumenta, seidauk bele halo dezenvolvimentu ida di’ak liu, tanba hasoru impasse polítika no pándemia COVID-19, ne’ebé afeta ba nasaun tomak iha mundu.

“Fretillin to’os nafatin, metin nafatin, buras nafatin, para atu kompete nafatin iha eventual sira ne’ebé atu mosu iha ita nia rain. Ha’u hateke ba kamarada sira nia oin, hau hanoin hetan momentu sira iha kotuk ne’ebé nakonu ho triste, no momentu ne’ebé alegria mós. Husu ita hotu atu hametin iha ita nia neon, luta ba Fretilin, hodi lori Fretilin hetan vítoria iha eleisaun jerál mai.”subliña Nakfilak.

Iha deklarasaun ofisial ne’e, estrutura organizasaun ne’e, entrega mós estatutu ba reprezentante munisípiu sira, atu hatutan ba postu no suku hotu.

Timor-Leste sei realiza eleisaun prezidensiál iha tinan 2022 no eleisaun Parlamentar iha tinan 2023.Say