PN kondena aktu komunidade tuda Ambulánsia

Deputadu bankada Uniaun Demokrátika Timor (UDT), Francisco David Carlos, kondena aktu komunidade ne’ebé tuda hasoru pesoál saúde no ambulánsia ne’ebé akontese iha Díli laran, bainhira tun atu evakua pasiente COVID-19 ba izolamentu.

Reprezentante povu ne’e hateten, aktu ne’ebé komunidade halo hasoru pessoal saúde, la dignifika no respeita servisu maka’as ne’ebé médiku no ekipa frontline sira halo, hodi kontra COVID-19.

“Ita haree aktu ne’e ita triste teb-tebes, ita tenke depózita ita nia konfiansa tomak ba ita-nia pesoál saúde sira ne’e, tanba COVID ne’e moras ida ne’e invízivel. Hanoin kesadaran de’it, ita haree katak dalaruma sira frustradu, hosi fatór ekonomia ne’e komunidade sira enfrenta, alénde COVID, ita haree katak loron-loron aumenta beibeik, depois dalaruma ema ne’ebé ba ne’e lakleur sai fali, buat sira ne’e hotu mós nia impaktu ba emosaun sosiedade nian mak halo atuasaun sira ne’e. Maibe hosi bankada UDT husu ba populasaun  tomak katak, ita tenke depózita ita-nia konfiansa ba pesoál saúde sira, tanba sira presta sira-nia servisu, no lakon sira-nia tempu, husik sira-nia família para halo atendimentu ba ita”,tenik Deputadu Francisco David ba jornalista, iha PN, Segunda (15/03/2021).

Alénde ne’e, deputadu CNRT, Domingos Carvalho, reforsa katak, aktu refere la merese komunidade atu halo ba pesoál saúde. Tanba ne’e, deputadu opozisaun ne’e enkoraja komunidade hotu, atu kolabora ho pesoál saúde, hodi kumpri regra hotu ne’ebé estabelese, nune’e prevene propagasaun COVID-19 ne’e.

“Sira husi saúde ne’ebé servisu ne’e foti risku ba sira-nia a’an, sira bele lakon sira-nia vida no família, ita komunidade ne’e mak tenke hatene ida ne’ebé mak bele no labele, tanba COVID ne’e la haree ba kór ka rasa”,subliña.

Kazu tuda ambulánsia ne’e, akontese ona ba dala rua, iha área Díli laran, tanba komunidade rejeita rezultadu pozitivu ne’ebé hatudu ba pasiente COVID-19. Dadaun ne’e, rejista kazu pozitivu COVID-19 hamutuk atus ida resin.Say