JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Xanana Prontu aprezenta provas iha Tribunál kona-ba Alkatiri simu subornu

Xanana Prontu aprezenta provas iha Tribunál kona-ba Alkatiri simu subornu

Prezidente Partidu CNRT, Kay Rala Xanana Gusmão, hatete, nia mak halo akuzasaun kontra Sekretáriu Jerál Partidu FRETILIN, Marí Bin Amude Alkatiri, katak, Alkatiri simu subornu husi ConocoPhillips, tanba ne’e husu Ministériu Públiku (MP) atu notifika nia hanesan arguidu, atu nia lori prova sira hotu kona-ba Alkatiri simu subornu husi ConocoPhillips ne’e ba aprezenta.

“Bele husu, tan-sá mak ha’u tenki sai hanesan arguido? Tanba ha’u mak fó hatene ba Membrus CPN no ba Kompanheirus Deputadus CNRT iha Parlamento Nacional, katak sira tenki foti kestaun subornu husi Conoco Philips ba Dr. Mari, no tanba ha’u mak husu CPN no haruka orientasoens ba Bankada CNRT, iha Parlamento Nasional, atu foti asuntu ne’e no la-ós sirania inisiativa. Ha’u mak halo akuzasaun kontra Dr. Mari katak nia simu suborno husi Conoco Philips, tan ne’e Ha’u tenki sai arguido! Nudar arguido, ha’u prontu ba hatán iha Tribunal no ha’u sei lori provas kona-ba subornu ne’e”,deklara eis Prezidente Repúblika, Kay Rala Xanana Gusmão, ba jornalista sira liu husi konferénsia ba imprensa, Segunda (29/3/2021), iha GMN-TV, Bebora, Díli, hafoin Kay Rala Xanana Gusmão ba Ministériu Públiku (MP), tanba nia simu notifikasaun iha dia 8, fulan ida ne’e, atu ba hanesan testemunha ba kazu queixa husi Mari ALkatiri hasoru Membrus CPN Partidu CNRT nian, maibé iha tiha nebá, Procurador Dr. Matias Soares hatudu fali prosesu seluk, iha nebé Mari Alkatiri hatama keixa hasoru Deputados 21 Bankada CNRT nian, iha Parlamentu Nasional.

Xanana haktuir, “Hakarak esklarese deit katak kazu subornu ne’e, sai tiha ona konhesimentu públiku, desde 2004/2005 no la ós buat foun ida. Durante prosesu negosiasaun Fronteira Marítima ho Australia, iha Komisaun Konsiliasaun, ha’u sempre lori dokumentus Conoco Philips nian ne’e, preparadu atu hatudu karik presiza.”

Prezensa eis-komandante em xefe Falintil, Xanana Gusmão ne´e, hodi aprezenta faktus sira ba MP, kona-ba ho akuzasaun sira husi CPN-CNRT no membru Deputadu 21, husi bankada CNRT, hasoru Sekretáriu Jerál partidu FRETILIN, Marí Alkatiri katak, publikasaun dokumentu balun husi Tribunal Distritál Colúmbia, Estadus Unidus Amérika (EUA) hateten, Oceanic Exploration deskonfia empreza ConocoPhillips, fó subornu USD Millaun $2.5 ba Marí Alkatiri, hodi hetan lisensa ba explorasaun mina iha kampu Bayu Undan, no sita mós konta bankária privadu rua husi banku ANZ no Westpac ne’ebé Marí Alkatiri iha.

Xanana Gusmão, to’o iha resintu MP nian iha tuku 9, akompaña kedas ho Polísia Korpu Seguransa Pessoal (CSP-Sigla Portugés), no hakat tama kedas ba edifísiu laran, no Xanana hi’it ho pasta metan.

Lee hotu :   Sistema Governasaun ne’ebé ideal ba nasaun sira pós konflitu

Prezensa líder karismátiku ne’e, hetan seguransa másimu husi Polísia Batallaun Orden Públiku, no komandante PNTL munisípiu Díli, Henrique da Costa, no segundu komandante PNTL munisípiu Díli Euclides Belo, ho membru sira.

Hafoin remata aprezenta faktus, Xanana Gusmão hakat sai husi odamatan MP no grupu apoiu Xanana Gusmão, iha ona resintu Prokuradória Jerál Repúblika nian ho espresaun hakilar viva Xanana.

Ho apoiante ne’ebé barak ne’e, Xanana Gusmão, dehan, “Se mak haruka imi mai iha ne’e, ba fila-fila”, tanba oras ne’e dadauk iha Munisípiu Díli aplika hela serka sanitária.

Maibé Eis Komandante Em Xefe FALINTIL Kay Rala Xanana Gusmão, lakohi sai sasin ba prosesu kazu Denúnsia Kalunioza, ne’ebé hato’o husi Sekretáriu Jerál Partidu FRETILIN Marí Alkatiri.

Nia dehan, Partidu CNRT, partidu ki’ik ida ne’ebé buka aprende organiza-an, hodi hatúr ninia estrutura ho órgauns, nebé hala’o ida-idak ninia funsoens, durante período entre Kongressu rua.

“Órgaun Máximu mak Comissão Política Nacional, ka CPN, iha nebé ha’u mak Presidente no, nudar Presidente CPN, ha’u maka tenki simu responsabilidade tomak husi desizoens sá-ida deit maka hasai husi órgaun Partidu nian ne’e.”dehan Xanana.

Xanana dehan, “Kazu ne’e mosu, tanba iha dia 22 de junho de 2020, ha’u  konvoka reuniaun CPN nian, ne’ebé hasai Komunikadu de Imprensa ida hodi dehan katak la simu ‘akuzasaun kalunioza’ nebé Dr. Mari, iha ninia Facebook, iha dia 21 ho dia 22 de junhu nebá duni, halo ba ha’u rasik, katak ha’u ba fahe ai-hán ba katuas no ferik sira, iha ha’u-nia atividades kona-ba Covid-19, atu soe rai-rahun ba povu nia matan, tanba buat sira ne’e atu subar deit korrupsaun nebé ha’u halo.  Ha’u tenki fó lembra katak, iha fatin hotu-hotu, iha nebé fahe ai-hán, ha’u sempre fo hatene ba ema hotu katak la-ós ha’u mak sosa sasán sira né, no ha’u hatudu, ba ema hotu, timoroan sira (balun emprezárius kiik, balun diretores, balun xefes de suku rasik no jovens sira) nebé hatudu laran diak no domin, hodi hala’o sira-nia solidariedade ba katuas no ferik sira nebé presiza duni, liu husi ha’u-nia atividades sira né”.

Xanana afirma, “Tanba ha’u la iha Facebook no la akompanha, ha’u-nia Kompanheiros sira sinti revoltadus ho ‘kalúnia’ ne’e, mak fó hatene ha’u no ha’u konvoka kedas reuniaun CPN. Iha reuniaun CPN, iha loron 22 de junho ne’e, depois de rona tiha expresaun de solidariedade ba ha’u no sira hotu nia raiva kontra Dr. Mari, maka mosu opsoens rua:  1 – hatama keixa, kontra Dr. Mari kona-ba ‘kalúnia’ ne’e. Maibé, haré ba ita-nia sistema judisial nebé namlele hela, mak ha’u fó preferênsia ba opsaun seluk;  2 – Tanba Dr. Mari temi dehan ha’u halo korrupsaun, mak ha’u fo orientasaun ba CPN no ba Bankada Parlamentar CNRT atu bolu atensaun ba Dr. Mari, hodi Senhor ne’e labele haluha ninia hahalok rasik, iha nebé iha akuzasaun katak nia simu subornu husi Conoco Philips”.

Lee hotu :   FIDELIS MAGALHÃES: LAIHA RAZAUN SUBTITUI MEMBRU GOVERNU PENDENTE

“Kompanheirus Membros CPN (órgaun Partido nian, nebé ha’u mak Presidente) sira hotu simu ha’u nia proposta no deside ba segunda opsaun, hodi hasai Komunikadu de Imprensa no haruka orientasoens ba Bankada CNRT atu foti mós kestaun ida ne’e, tanba Partidu la simu katak Sekretário Jeral Fretilin, Dr. Mari, bele iha liberdade atu kritika no halo ‘akuzasaun kalunioza’ ba ha’u, nudar Presidente Partidu CNRT”.haktuir Xanana.

Tan ne’e duni, nu’udar Prezidente CPN ne’ebé maka iha kompeténsia tomak atu konvoka reuniaun ba Órgaun ida ne’e, nia labele sés-an husi responsabilidade tomak.

“Ha’u labele sés-an husi responsabilidade ha’u-nian iha asuntu ida ne’e. Ha’u labele sai kobarde atu fó fali todan ba ha’u-nia Kompanheirus Membrus CPN no, menus liu, ba Deputados iha Bankada CNRT nian, tanba ha’u mak konvoka Reuniaun CPN-nian iha 22 de Junhu 2020, atu foti desizaun nebé fó sai tiha ona ba públiku. Iha nebá, ha’u la asina tanba kestaun ne’e relasiona ho ha’u-nia an rasik, hodi ha’u-nia Kompanheirus Membros CPN simu katak sira mak asina, maski ha’u mak konvoka, dirije no taka reuniaun né. Tan ne’e, ohin, ha’u ba fó hatene ba Ministériu Públiku katak ha’u ezije atu sai arguidu, no la ós hanesan ‘sasin’ ka testemunha, tuir karta nebé ha’u hakerek ona ba Procurador-Geral da República, Dr. José Ximenes no ba Procurador, Dr. Adérito António Pinto Tilman, nebé iha fulan Janeiru no Fevereiru kaer hela asuntu ne’e. Em vez de lê didiak ha’u nia karta, nebé entrega ba Procuradores na’in rua temi iha leten, Ministério Público preokupa fali atu bolu Deputadus CNRT nian, nudar arguidos, hodi hatudu deit katak la konhese Estatuto dos Deputados, nebé, iha ninia artigo 10º. hakerek: “Deputadus sira la responde sivil, kriminal ka disciplinarmente kona-ba votos no kona-ba opinioens nebé sira hasai, iha ezersísiu sira-nia funsoens”.dehan Xanana.

Lee hotu :   Antes deside promulga ka veta, PR sei estuda lei atividade petrolíferu

“Tan ne’e, maka ohin mós, ha’u dehan ba Procurador Dr. Matias Soares katak ha’u ezije ba Ministério Público atu bolu fali ha’u nudar arguido, hodi bele ona hatán kona-ba kazu ne’e. Tanba, iha Kódigu Prosesu Penal, iha Seksaun IV, kona-ba Prova Testemunhal, iha ninia Artigu 124º., kona-ba Impedimentu, dehan ‘Ema ne’ebé tama iha prosesu ida, hanesan arguidu ka lezadu, labele fó depoimento iha prosesu ne’e’, nudar sasin. Tuir Kódigu Prosesu Penal ninia Kapítulu VI, kona-ba Suspeitu, arguidu no Kondenadu, iha ninia Artigu 59º., kona-ba Konstituisaun hanesan Arguido, iha ninia númeru 1, dehan ‘Hetan kualidade hanesan arguidu ema ne’ebé hasoru akuzasaun iha prosesu penal’. Nudar arguido, ha’u pronto ba hatán iha Tribunal no ha’u sei lori provas kona-ba suborno ne’e.  Ohin maka ne’e deit, hodi hein katak Ministério Público bolu fali ha’u, nudar arguido, hodi ha’u aprezenta ona evidênsias, nune’e Tribunal atu bolu ha’u ba hatán.

Xanana Gusmão, mos hatete, nia prontu ba kadeia, bainhira lakon iha prosesu justisa ba kazu Denúnsia Kalunioza, ne’ebé aprezenta hosi nia adversáriu Sekretáriu Jerál partidu FRETILIN, Marí Alkatiri.

Tuir Xanana Gusmão, nia parte hasoru prosesu justisa durante okupasaun Indonézia dala rua ona, tanba defende soberania.

“Ha’u prontu, tanba sá, ha’u ba kadeia dala rua ona, ne’ebé ba dala tolu nian ne’e. Ne’ebé dala ida UDT mai kaer ha’u, loron hitu, ba hamós UDT nia fo’er tanba defende bandeira FRETILIN, iha sede FRETILIN, tanba ne’e sira kaer ha’u lori ba kadeia. Iha fali seluk ha’u tama kadeia loron naruk oituan, iha 1992 ha’u tama kadeia tanba defende bandeira RDTL, durante tinan hitu ha’u iha kadeia, ne’ebé buat kadeia ne’e ba ha’u la hakfodak ida”,hateten Kay Rala Xanana Gusmão.

Kona-ba depoimentu antes iha loron 18 fulan Janeiru, tinan ne’e, Marí Alkatiri mós termina ona nia depoimentu ba Ministériu Públiku.

Kazu ne´e rasik antes ne’e, Marí Alkatiri hato’o keixa kontra membru CPN-CNRT sira, mak hanesan, Virgílio Smith, Jacinto Rigoberto, Bendito Freitas, Tomás Cabral, Francisco Ikulai, Francisco da Costa Guterres, no deputadu bankada CNRT 21, no la’os keixa Prezidente Partidu.San

 

Add to Comments Here!!!!

error: Content is protected.
Secured By miniOrange
You might also like:
Aban estudante 72 iha Israel to’o TL

Governu kontrata ona aviaun Citilink, hodi...

Kazu konfirmadu Covid-19 foun 11, atuál baixa 322

Kordenador Forsa-Tarefa ba Prevensaun no Mitigasaun...

PR Lú Olo: PNTL presiza infraestrutura ne’ebé di’ak

Prezidente Repúblika (PR), Francisco Guterres Lú...

Close