AJAR: Governu bo’ok-an tarde responde ba situasaun atuál

Diretór Asia Justice and Rights (AJAR), José Luis Oliveira, hatete, Governu ida ne’e bo’ok-an tarde atu responde ba situasaun emerjénsia oras ne’e dadauk, iha ne’ebé populasaun presiza ai-han no seluk tan.

“Problema hamlaha mos bele lori problema bo’ot iha situasaun covid no mós ba saude ema nian, tanba bainhira laiha aihan ba ema atu han mak nia saúde no imunidade mós ladiak no sai vulnerável tebes ba aihan. Tanba bainhira Governu sulan nia populasaun, Governu la fo han ba nia populasaun mak sei mosu problema bo’ot no ema barak sei mate tanba hamlaha, ezemplu kazu iha Tasi-Tolu ema tenke tara-an tanba deit hahan laiha. Governu bo’ok an tarde liu atu responde situasaun hanesan ne’e no la antesipa bainhira sulan ema, regra jeral tuir perspetiva direitu umanu bainhira atu sulan ema tenke fó han no bainhira hatama ema iha kadeira tenke fo han, agora se Governu sulan ema ho interese seluk maka Governu tenke fo aihan ba ema nune’e ema labele sente prejudikadu hanesan menus aihan. Entaun ho desizaun Governu nian ne’ebé suspende konfinamentu domisiliáriu jeral fo biban ona ba komunidade ne’ebé moris depende deit ba negósiu ki’ik sira inklui motorista ba mikrolet no taxi sira, tanba durante serka sanitária Governu foin fo apoiu deit ba estudante sira ne’ebé hela iha kost, maibe ema ne’ebé hamlaha laos estudante deit, dalabarak realidade sira hanesan ne’e Governu sira la sente tanba Governu sira nia saláriu garantidu tanba maske hela iha uma maibe nafatin simu saláriu”,dehan Diretór AJAR, José Luis Oliveira, ba JN-Diário, Sesta (09/04/2021), iha Farol, Díli.

Alende ne’e José Luis Oliveira, hatete, hakarak ka lakohi Governu tenke altera regra serka sanitária hodi suspende konfinamentu domisiliáriu jerál, tanba iha situasaun agora populasaun tenke sai hodi salva sira-nia vida hosi inundasaun hodi la kumpri regra serka sanitária.

“Hakarak ka lakohi Governu tenke altera regra serka sanitária hodi ajusta ba situasaun dezastre naturais, ne’ebé akontese. Tanba se Governu la altera mak regra refere laiha folin, tanba bandu ema labele sai maibé realidade komunidade obrigado tenke sai hodi salva sira-nia an hosi inundasaun”,dehan Diretór AJAR.

José Luis Oliveira, afirma, se Governu mantein ho regra serka sanitária ne’ebé iha maka, família vítima ne’ebé oras ne’e hela iha Sentru Evakuasaun sira bele konsidera komete krime desobediénsia no Polísia bele ba kaer hotu sira hanesan ema hirak ne’ebé antes ne’e Polísia kaer iha tasi-ibun tanba kontra regra serka sanitária.

Tanba ne’e hakarak ka lakohi Governu tenke ajusta regra hodi halo alterasaun, se lae regra ne’e folin laiha no komunidade la obdese tanba komunidade tenke salva sira nia an hosi dezastre udan bo’ot halo ema lubun tenke halo sira nia vida inklui uma no sasán barak hetan estragus, sublina Diretór ne’e.

Nia hatutan,Governu aplika regra serka sanitária maibe Governu la akompaña providensia nesesidade alimentu ba populasaun sira ne’ebé labele sai hosi uma, tanba bainhira populasaun ne’ebé moris depende ba negósiu no sira labele sai hosi uma mak, sira enfrenta problema seluk hanesan hamlaha.

“Maibé agora oinsa ho povu kiik ne’ebé halo servisu mak simu salario inklui sira ne’ebé halo negosiu, entaun buat sira ne’e hotu fo hanoin ba Governu, bainhira atu aplika regra tenke iha balansu ho medida ne’ebé efetivu ba ema sira ne’ebé vulnerável tebes ba moras Covid-19, tanba lolos ne’e ema ne’ebé vulnerável ba moras Covid-19 mak  Governu tenke fo atensaun la’ós Governu halo regra iha jeral, maibe prejudika ema seluk”,haktuir.

José Luis Oliveira hatutan, Covid-19 nia virus bele influensia hanesan mos ho virus sira seluk ne’ebé daet liu hosi fani ka mear, entaun se Governu aplika medida ruma tenke foka liu ba ema ne’ebé idade avansadu tinan 60 ba leten no ema ne’ebé mak hetan moras króniku kleur ona, maibe regra ne’e Governu halo jeral deit hodi prejudika fali problema seluk.

“Ha’u haree Governu suspende konfinamentu domisiliáriu jeral ho razaun tanba komunidade hasoru hela problema dezastre naturais. De faktu hatudu katak, ema barak agora la kumpri regra serka sanitária tanba okupadu salva sira-nia an hosi dezastre bo’ot ne’ebe sira hasoru”.dehan.

Governu tenke halo fali revizaun ba medida oinsa mitiga propagasaun Covid-19, tanba Governu tenke foti medida ida adekuadu, efetivu ba kontrolu sem sakrifika no prejudika problema seluk. Covid-19 ejiste ona iha tinan kotuk maibé tanba tinan ne’e Governu foin halo teste ba populasaun ho nune’e númeru aumenta kada loron.Fel

 

Leave a Reply

Your email address will not be published. Required fields are marked *