Bankada CNRT husu PR nomeia ona PGR foun

Deputadu bankada CNRT, Arão Noe Amaral, husu Prezidente Repúblika (PR), Francisco Guterres Lú Olo, atu nomeia ona ema foun hodi asumme pasta nu’udar Prokuradór Jerál Repúblika (PGR­_sigla portugés), José da Costa Ximenes, tanba nia mandatu termina ona iha loron 15, fulan Abril ne’e.

Deputadu komisaun A asuntu konstitusionais no justisa ne’e subliña, laiha ona dalan atu estende tan mandatu ba Prokuradór Jerál atuál, tanba prokuradór refere assume ona pasta refere ba tinan 8 ho mandatu ba dala rua.

“Mandatu ida ba agora ne’e, segundu mandatu nian, tuir lei labele halo nomeasaun ba dala-3, nia mandatu ne’e hotu iha tinan ida ne’e. Tuir lei mós hateten katak kompeténsia atu nomeia ne’e mak Prezidente Repúblika, tanba ne’e PR mak sei nomeia PGR foun, liuhosi proposta ne’ebé hato’o hosi konsellu ba iha ne’ebá. PGR sesante bele hala’o nia mandatu to’o PGR foun simu posse, ida ne’e mak tuir karatér lei ninian. Atu labele husik fatin ne’e vakum, para labele PGR ne’ebé nia mandatu hotu ona, nia kontinua hela nia funsaun sei iha nomeasaun ofisial ida, hau sujere ba PR, atu toma inisiativa ona, halo nomeasaun ba PGR foun, atu nune’e priense ona fatin ne’e hodi hala’o nia knár ba mandatu foun ne’e, tuir estatutu no lei sira ne’ebé vígor.”tenik Eis Prezidente PN ne’e ba jornalista iha PN, Sesta(16/04/2021).

Liga ho asuntu ne’e, GMN tenta atu konfirma ho Prezidente komisaun A, deputadu Joaquim dos Santos, maibe iha Sesta ne’e, deputadu refere laiha Parlamentu Nasionál.

Antes ne’e, atuál Prokuradór Jerál Repúblika, José da Costa Ximenes, kompromete, atu aprezenta relatóriu servisu ba Parlamentu Nasionál, antes prokuradór foun asume kargu.

José da Costa Ximenes nomeiadu ba mandatu dahuluk, iha fulan Abril tinan 2013, no iha tinan 2017 nomeia tan ba mandatu daruak nian to’o fulan Abril, tinan 2021 ne’e.Say

Leave a Reply

Your email address will not be published. Required fields are marked *