PN apresia solidariedade GAM ba hamoos sidade Díli

Prezidente Parlamentu Nasionál (PPN), Aniceto Guterres apresia ho asaun solidariedade hosi Grupu Arte Marsial (GAM) ne’ebé organiza malu hodi hamoos sidade Díli no vítima inundasaun sira-nia uma ne’ebé implika hosi  udan no anin boot.

Aniceto konsidera, aktu ne’ebé joven sira hosi grupu arte marsial halo ne’e, nu’udar ezemplu di’ak, hodi kesi metin paz no amizade, liuhosi asaun solidariedade hodi hamoos vítima sira nia uma no sidade laran.

“Hanesan Prezidente Parlamentu Nasionál, aproveita oportunidade ida ne’e, atu manifesta ha’u nia laran-haksolok no hakarak kongratula líder grupu arte-marsiais sira hotu, inklui KORK ba sira nia membru nia partisipasaun no kontribuisaun direta hodi servisu hamutuk halo limpeza iha sidade Dili, depoizde inundasaun iha Domingu, dia 4 de Abril, asaun ne’e demonstra imi nia jestu solidariedade iha situasaun kritiku ne ebé ita nia nasaun hasoru. Iha momentu difisil no krusiál sira hanesan ne’e, ita nia rai-lulik bolu ita hotu atu hamutuk, hases tiha ita nia kór grupu saidá de’it, kontinua unidade no oinsá tulun íta nia maluk sira ne’ebé lakon sira nia família, hela-fatin no sasan. Dala ida tan, nu’udar Prezidente Parlamentu Nasionál louva tebes inisiativa sira hanesan ne’e. Ita hotu he’in katak, ambiente servisu hamutuk entre grupu arte-marsiais sira, sei kontinua buras no forte liu-tan iha futuru. Ha’u hakarak apela ba grupu arte-marsiais hotu-hotu, inklui KORK ne’ebé nia membru sira maiorparte jovens ho idade produtivu, atu apoia polítika governu iha área dezenvolvimentu desportivas, liu-liu servisu hamutuk entre grupu arte-marsiais. SEJD no Parlamentu Nasionál atu haree nesesidade lejislativa ne’ebé seidauk kompleta no presiza aborda ho klean atu konsidera aspetu hotu-hotu ho komprensivu ne’ebé akomoda espetativa sosiedade ni’an ba dezenvolvimentu grupu arte-marsiais iha Timor-Leste.”deklara Aniceto ba jornalista iha konferénsia imprensa ne’e, Segunda(12/04/2021)

Alénde ne’e, líder órgaun lejisladór ne’e mós kongratula grupu arte marsial Kmanek Oan Rai Klaran (KORK) ne’ebé selebra nia aniversáriu ezistensia nian, iha loron 12 fulan Abril ne’e.

Aniceto argumenta tan, durante ne’e, organizasaun hosi grupu arte marsias seluk nne’ebé selebra nia loron espesial nunka fó parabens ka kongratula, tanba la iha koñsimentu ba sira nia loron no fulan aniversaiu nian.

Maibe hosi KORK hetan konvite informasaun direita hosi líder másimu KORK nian, Nai Mori Bukar.

“Nu’udar Prezidente Parlamentu Nasionál, hakarak lori ha’u nia naran no Parlamentu Nasionál ni’an, hato’o parabens no feliz aniversáriu ba arte marsiais Kmanek Oan Rai Klaran (KORK), ne’ebé selebra kada tinan, iha 12 de Abril. Timor-Leste nu’udar Estadu Direitu e Demokrátiku, tamba ne’e sidadaun no grupu hotu-hotu iha responsabilidade morál atu kontribui ba sosicdade ida ne’ebé aberta, produtivu, justu, tolerante no dinámika. bazéia ba ida ne’e, nu’udar Iíder másimu orgaun soberanu ida, hakarak apela no dezeja ba grupu arte-marsiais KORK no grupu arte-marsiais sira seluk atu hakruk ba lei sira ne’ebé PN aprova, husu atu kontribui nafatin ba paz, estabilidade seguransa no kumpre nafatin protokolu Covid-19. Parlamentu Nasionál sei ezerse nia dever politiku no moral atu halo esforsu hotu-hotu, fó importánsia ba pákote lejislativa relevante sira seluk, ne’ebé sei kontribui hodi dinamiza liu-tan grupu arte-marsiais sira, hodi iha koordenasaun di’ak liu ho governu, estruturadu no organizadu no ida ne’e sei permite no loke dalan ba membru arte-marsiais sira atu utiliza sira nia potensialidade no abilidade tomak ho baze orientadu ba atividade desportivas iha nivél nasionál, rejionál no mundiál.  Ho forma ou dalan ida ne’e mak, ita bele hetan konfiansa totál husi sosiedade ba grupu arte-marsiais hotu-hotu ne’ebé kontribui ativamente no direta ba dezenvolvimentu área desportivas iha Timor-Leste.”dehan.

Asaun limpeza ne’e grupu arte marsial no joven sira seluk hala’o iha semana kotuk,

Ne’ebé organiza hosi Sekretáriu Estadu Juventude No Desportu(SEJD) hodi ajuda hamoos vítima inundasaun sira nia uma, no tahu iha kapital Díli, inklui palasiu prezidente nia oin.Say

Leave a Reply

Your email address will not be published. Required fields are marked *